Media şirkətində 120 milyon dollarlıq sövdələşmə

“The Weather Channel” və 30-dan çox yerli telekanalın sahibi olan Byron Allen “BuzzFeed”də nəzarət payı əldə etməyə hazırlaşır.
DuzXeber.az xəbər verir ki, “BuzzFeed”in açıqlamasına görə, Allen şirkətin 40 milyon səhmini hər biri 3 dollar olmaqla almağı planlaşdırır. Sövdələşmənin ümumi məbləği 120 milyon dollar dəyərləndirilir.
Məlumata əsasən, əməliyyat başa çatdıqdan sonra Allenin “Allen Family Digital” adlı strukturu “BuzzFeed”in dövriyyədə olan səhmlərinin 52 faizinə sahib olacaq. Bu isə ona şirkət üzərində nəzarət imkanı verəcək.
Sövdələşmənin 20 milyon dolları nağd, qalan 100 milyon dolları isə beş il müddətinə nəzərdə tutulan borc öhdəliyi formasında maliyyələşdiriləcək. Həmin borc öhdəliyi üzrə illik faiz dərəcəsinin 5 faiz olacağı bildirilir.
Razılaşmanın may ayının sonunadək tamamlanması gözlənilir. Sövdələşmə başa çatdıqdan sonra Byron Allenin “BuzzFeed”in baş icraçı direktoru və idarə heyətinin sədri vəzifələrini icra edəcəyi qeyd olunur. Şirkətin təsisçisi Jonah Peretti isə “BuzzFeed AI” üzrə prezident vəzifəsinə keçəcək.
Bu addım “BuzzFeed”in maliyyə çətinlikləri fonunda baş verir. Şirkət mart ayında fəaliyyətini davam etdirmə qabiliyyəti ilə bağlı risklər barədə xəbərdarlıq etmişdi və reklam bazarında sosial platformalarla rəqabətin artması səbəbindən təzyiqlə üzləşdiyini bildirmişdi./EDnews