TƏBİB-də yeni nəfəs: Peşəkarlıq, operativ qərar və insan həyatına verilən dəyər

DuzXeber.az xəbər verir ki, hər bir dövlət qurumunun fəaliyyəti haqqında ən obyektiv qiyməti statistik rəqəmlərdən daha çox vətəndaşların gündəlik həyatda yaşadığı hadisələr verir. Xüsusilə söhbət insanların sağlamlığından və həyatından gedirsə, burada atılan hər bir addımın, verilən hər bir qərarın xüsusi əhəmiyyəti var.

Son aylarda TƏBİB-də həyata keçirilən kadr dəyişiklikləri cəmiyyətdə böyük maraq doğurub. Bu dəyişikliklərin mərkəzində isə İcraçı direktor vəzifəsinə təyin olunan Anar Bayramov və İctimaiyyətlə əlaqələr və kommunikasiya departamentinin rəhbəri vəzifəsinə təyin olunan Zara İbrahimzadə dayanırlar.

Anar Bayramovun peşəkar fəaliyyəti göstərir ki, o, yalnız həkim deyil, həm də müasir idarəçilik prinsiplərini mənimsəmiş rəhbərdir. Azərbaycan Tibb Universitetini fərqlənmə diplomu ilə bitirməsi, tibb üzrə fəlsəfə doktoru elmi dərəcəsi alması, eyni zamanda Azərbaycan Dövlət İqtisad Universitetində iqtisadiyyat və idarəetmə üzrə magistr təhsili keçməsi onun həm tibbi, həm də idarəçilik sahəsində güclü bilik bazasına malik olduğunu göstərir.

Uzun illər "MediClub" klinikasında, "A-Group" Sığorta Şirkətində, Əmək və Əhalinin Sosial Müdafiəsi Nazirliyində və digər mühüm dövlət qurumlarında rəhbər vəzifələrdə çalışması ona geniş idarəçilik təcrübəsi qazandırıb. Təsadüfi deyil ki, Prezidentin sərəncamı ilə yüksək dövlət vəzifələrinə irəli çəkilməsi də onun peşəkarlığının göstəricilərindən biri hesab olunur.

Digər mühüm təyinat isə TƏBİB-in İctimaiyyətlə əlaqələr və kommunikasiya departamentinə rəhbər təyin edilən Zara İbrahimzadə oldu. ABŞ-ın Corc Mason Universitetinin məzunu olan Zara İbrahimzadə uzun illər Türkiyədə fəaliyyət göstərərək "LUKOİL Türkiyə", "SOCAR Türkiyə", "Akkuyu Nükleer" kimi beynəlxalq şirkətlərdə, daha sonra isə ABB və "PAŞA Bank" kimi aparıcı maliyyə qurumlarında marketinq və kommunikasiya sahəsində uğurlu layihələrə rəhbərlik edib. Onun zəngin beynəlxalq təcrübəsi, müasir idarəçilik bacarığı və operativ qərarvermə qabiliyyəti bu təyinatın uğurlu seçim olduğunu indidən göstərməyə başlayır.


Bəzən bir hadisə uzun-uzadı çıxışlardan və təqdimatlardan daha çox həqiqəti ortaya qoyur.

Həftənin ikinci günü axşam saatlarında yaxınlarımızdan birinin qız övladının vəziyyəti qəfil ağırlaşıb. O, dərhal Füzuli Rayon Mərkəzi Xəstəxanasına çatdırılıb. Yaxınlarımızın mənə verdiyi məlumata görə, vəziyyət son dərəcə ağır idi. Həmin saatlarda növbətçi həkim eyni vaxtda bir neçə ağır xəstə ilə məşğul olduğundan əməliyyatın dərhal həyata keçirilməsi müəyyən çətinliklər yaradırdı.

Saat təxminən 19:54 idi. İş vaxtı artıq başa çatmışdı. Açığını desəm, həmin anda kiminlə əlaqə saxlayacağımı bilmirdim. Ancaq bir məsələni yaxşı bilirdim. TƏBİB-in yeni təyin olunmuş İctimaiyyətlə əlaqələr və kommunikasiya departamentinin rəhbəri Zara İbrahimzadə haqqında eşitdiklərim onun işinə son dərəcə məsuliyyətlə yanaşan, operativ, peşəkar və insan amilinə xüsusi önəm verən rəhbər olması idi.

Məhz buna görə də tərəddüd etmədən Zara İbrahimzadə ilə əlaqə saxladım və vəziyyəti olduğu kimi diqqətinə çatdırdım. O, məsələni diqqətlə dinlədi, xəstənin soyadını soruşdu və dərhal araşdırılacağını bildirdi.

Aradan çox az vaxt keçmişdi ki, yaxınlarımız yenidən mənə zəng etdilər. Bildirdilər ki, xəstəxanaya əlavə həkim briqadası gəlib, tibb işçiləri səfərbər olunub və ağır vəziyyətdə olan xəstə dərhal əməliyyata götürülüb. Bir neçə saat davam edən mürəkkəb əməliyyat peşəkar həkimlərin səyi nəticəsində uğurla başa çatdırılıb.

Əlbəttə, burada ən böyük təşəkkür həmin gecə xəstənin həyatı uğrunda mübarizə aparan bütün həkimlərə, anestezioloqlara, cərrahlara, tibb bacılarına və digər tibb işçilərinə düşür. Onların peşəkarlığı və fədakarlığı olmasaydı, nəticə də fərqli ola bilərdi.

Mən isə bir jurnalist kimi həmin hadisədən belə bir nəticə çıxardım: dövlət qurumunda peşəkar rəhbərlik, düzgün koordinasiya və operativ kommunikasiya olduqda vətəndaş özünü tək hiss etmir. Müraciətə biganə yanaşılmır, məsələ nəzarətə götürülür və nəticə əldə olunur.

TƏBİB uzun illər müxtəlif problemlərlə gündəmə gəlib, tənqidlər də az olmayıb. Lakin istənilən sistemin inkişafı peşəkar kadrların seçilməsindən başlayır. Bu gün Anar Bayramovun rəhbərliyi ilə həyata keçirilən idarəçilik modelinin, Zara İbrahimzadənin isə vətəndaşla dövlət arasında etibarlı kommunikasiya körpüsü yaratmaq istiqamətindəki fəaliyyətinin gələcəkdə səhiyyə sisteminə müsbət töhfələr verəcəyinə ümid etmək üçün əsaslar var.

Çünki səhiyyədə ən böyük göstərici hesabatlar deyil, xilas edilən insan həyatı, qorunan sağlamlıq və vətəndaşın dövlətə olan inamıdır. Bu inamı qorumaq isə yalnız savadlı, vicdanlı, məsuliyyətli və peşəkar rəhbərlərlə mümkündür.