Rusiyada fərdiləşdirilmiş melanoma peyvəndinin ilk klinik sınaqları müsbət nəticə verib.
DuzXeber.az xəbər verir ki, bu barədə yerli KİV məlumat yayıb.
Bildirilib ki, peyvənd tətbiq olunan ilk pasiyentdə şiş və metastazlarla mübarizə üçün zəruri immun cavab formalaşıb.
Peyvəndin hazırlanmasında iştirak edən Qamaleya Tədqiqat İnstitutunun elmi direktoru Aleksandr Ginzburq qeyd edib ki, aprel ayında ilk dozanı qəbul edən, üçüncü mərhələdə melanoma diaqnozu qoyulan 60 yaşlı xəstənin müalicəsi davam edir və ilkin nəticələr ümidvericidir.
Rusiya Səhiyyə Nazirliyi ötən il inkişaf etmiş melanoma üçün hazırlanan "Neooncovac" adlı mRNT əsaslı peyvəndin istifadəsinə icazə verib. Peyvənd xəstənin şiş və sağlam toxumasından götürülən nümunələrin genetik analizinə əsasən yalnız həmin şəxs üçün hazırlanır və immun sisteminə xərçəng hüceyrələrini tanıyaraq məhv etməyi hədəfləyir.
Qamaleya İnstitutu yaxın aylarda daha 10 xəstə üçün fərdi peyvənd hazırlamağı planlaşdırır. Bundan əlavə, institut mədəaltı vəzi, böyrək və kiçik hüceyrəli olmayan ağciyər xərçənginə qarşı yeni müalicə üsulları üzərində də tədqiqatlarını davam etdirir./Müəllif: Roza/

Paylaş