Yeni tədris ilinin başlanması ilə əlaqədar paytaxt yollarında nəqliyyat sıxlığının artması, xüsusilə məktəb və universitetlərin ətrafında müşahidə olunan xaotik vəziyyət hər il olduğu kimi yenidən aktual müzakirə mövzusuna çevrilib. Daxili İşlər Nazirliyinin Nəqliyyatı İntellektual İdarəetmə Mərkəzinin (NİİM) mətbuat katibi Ömər Xıdırovun bildirdiyinə görə, tədris müəssisələrinin yaxınlığındakı küçə və prospektlərdə valideynlərin və sürücü tələbələrin yol hərəkəti qaydalarına əməl etməməsi süni tıxacların yaranmasına birbaşa təsir göstərir.

Yaranan sıxlıqların qarşısını almaq məqsədilə NİİM tərəfindən kameralar vasitəsilə sərt nəzarət həyata keçiriləcək, pozuntu halları aşkarlandıqda isə yol polisinə dərhal məlumat veriləcək və zəruri istiqamətlər üzrə işıqforlara "yaşıl dalğa" rejiminin tətbiqi təmin olunacaq. Qurum şəxsi avtomobilləri ilə övladlarını dərsə gətirən şəxslərə maşınlarını qadağan olunmuş zonalarda deyil, məhz yeraltı, yerüstü dayanacaqlarda və rəsmi parklanma yerlərində saxlamağı şiddətlə tövsiyə edir, əks halda sürücüləri ciddi cərimələrin gözlədiyi qaçılmazdır. Lakin paytaxtda mövcud parkinq yerlərinin azlığı və xüsusilə təhsil ocaqlarının ətrafında bu cür ünvanların məhdud olması sürücülərin işini xeyli çətinləşdirir, bu da inzibati tədbirlərlə yanaşı daha köklü infrastruktur həllərinin vacibliyini gündəmə gətirir.

Məsələ ilə bağlı DuzXeber.az-a danışan nəqliyyat məsələləri üzrə ekspert Tale Ələddinzadə qeyd edib ki, mövcud problem təkcə fərdi sürücülərin qayda pozuntuları ilə məhdudlaşmır, əksinə, şəhərsalma və məktəbətrafı infrastrukturun müasir tələblərə cavab verməməsindən qaynaqlanır: "Təhsil müəssisələrinin ətrafında nəqliyyat axınının tənzimlənməsi kompleks yanaşma tələb edir və yalnız cərimələrlə bu problemi tam aradan qaldırmaq qeyri-mümkündür. Valideynlər bir çox hallarda məcburiyyət qarşısında qalaraq avtomobillərini yol kənarlarında saxlamaq məcburiyyətində qalırlar, çünki əksər məktəblərin yaxınlığında valideynlərin qısa müddətə övladlarını düşürüb getməsi üçün xüsusi zolaqlar və ya kifayət qədər qısamüddətli dayanacaq infrastrukturu mövcud deyil. NİİM-in tətbiq etdiyi "yaşıl dalğa" rejimi və kameralarla nəzarət mexanizmləri qısamüddətli dövrdə nəqliyyat axıcılığını qismən təmin edə bilər, lakin uzunmüddətli perspektivdə problemin kökündən həlli üçün məktəblərin öz ətrafında xüsusi təhkim olunmuş enmə-minmə məntəqələri yaradılmalı və ya ümumilikdə məktəb avtobusları sisteminin əhatə dairəsi genişləndirilməlidir".

Onun sözlərinə görə, mövcud vəziyyətin aradan qaldırılması üçün yalnız inzibati tənbeh tədbirlərinə və cərimələrə üstünlük vermək kifayət deyil, həmçinin paytaxtda ictimai nəqliyyatın keyfiyyətinin artırılması, metro və avtobus xətlərinin məktəblərə inteqrasiyası sürətləndirilməlidir: "Əgər valideynlər övladlarını təhsil ocaqlarına rahat, təhlükəsiz və operativ şəkildə ictimai nəqliyyatla çatdırmaq imkanına malik olmasalar, onlar hər zaman şəxsi avtomobillərinə üstünlük verəcək və bu da tədris ilinin ilk günlərindən etibarən küçələrdə süni sıxlıqların qaçılmaz olaraq yenidən təkrarlanmasına gətirib çıxaracaq. Ona görə də təkcə sürücüləri cərimələmək deyil, paralel olaraq məktəblərin yerləşdiyi ərazilərdə yol hərəkətinin təşkilini yenidən qurmaq, alternativ parklanma imkanları yaratmaq və valideynlər üçün maarifləndirmə kampaniyaları həyata keçirmək lazımdır".//Tunar

Paylaş