Azərbaycanda kənd təsərrüfatı texnikasının alınması ilə bağlı məlumatların elektron sistemə daxil edilməsi qaydası dəyişib.

DuzXeber.az xəbər verir ki, bununla bağlı Azərbaycan Respublikası Nazirlər Kabineti qərar qəbul edib.

Qərarla Nazirlər Kabinetinin 1995-ci il 14 mart tarixli 58 nömrəli Qərarı ilə təsdiq edilmiş “Azərbaycan Respublikasında nəqliyyat vasitələri, kənd təsərrüfatı texnikası və onlar üçün ehtiyat hissələrinin komisyon satışı Qaydaları”na dəyişiklik edilib.

Dəyişikliyə əsasən, kənd təsərrüfatı texnikasının alınması üzrə həyata keçirilən ödənişlər barədə məlumatlar və həmin texnikanın təhvil verilməsini təsdiq edən sənədlər “Elektron kənd təsərrüfatı” informasiya sisteminə daxil ediləcək.

Bu məlumatların sistemə daxil edilməsi təhvil verənin razılığı əsasında həyata keçiriləcək.

Beləliklə, kənd təsərrüfatı texnikasının alınması zamanı həyata keçirilən ödənişlər və texnikanın alıcıya təhvil verilməsini təsdiq edən sənədlərlə bağlı məlumatların “Elektron kənd təsərrüfatı” informasiya sistemində əks olunması təmin ediləcək.

Qeyd edək ki, qərar Azərbaycan Respublikası Prezidentinin 2026-cı il 5 mart tarixli “Kənd təsərrüfatında güzəştli maliyyələşdirmə barədə bir sıra məsələlərin tənzimlənməsi və bununla əlaqədar Azərbaycan Respublikası Prezidentinin bəzi fərmanlarında dəyişiklik edilməsi haqqında” fərmanının icrası məqsədilə qəbul olunub.

Qərar Baş nazir Əli Əsədov tərəfindən 11 sentyabr 2026-cı ildə imzalanıb.

Paylaş