"Qarabağ"ın qolu, ədalətsizliyə qarşı vurulan zərbə

Alman klubuna qarşı oynayan "köhlən atlar" doğma meydanda oyuna inamla başladı. Azərbaycan çempionu matçın dördüncü dəqiqəsində Kamilo Duranın qolu ilə hesabda irəli keçdi. Lakin bu qola çox sevinə bilmədik. Qonaqların heyətində oynayan Can Uzun 11-ci dəqiqədə hesabı bərabərləşdirdi. Oyunun ilk yarısı bərabərliklə başa çatdı. 

İkinci hissə isə daha gərgin keçdi. Hər iki komandaya 3 xalı qazanmaq lazım idi. Qonaqlar ard-arda gələn məğlubiyyət və bərabərliklər seriyasını bitirməyə can atırdı. "Qarabağ" UEFA Çempionlar Liqasının turnir cədvəlində rəqibdən üç xal öndə olsa da, ilk 24-lükdə olmaq üçün növbəti 3 xalı təmin etmək istəyirdi. 

Oyunun gedişatında "Ayntraxt" baş hakim Sandro Şarerin penalti qərarından yararlandı. Fares Çaibi topu qapıya göndərdi və rəqib bununla da hesabda önə keçdi - 1 - 2.

Hakimin bu qərarı haqlı idi. Lakin həmin qoldan az öncə oxşar epizod rəqibin qapısı önündə də yaranmışdı. Hər kəs hakimdən 11 metrlik cərimə zərbəsi qərarını gözləsə də, o, bundan imtina etdi və oyuna davam dedi.

Bundan sonra ekranda Ağdam təmsilçisinin baş məşqçisi Qurban Qurbanov göründü. Təbii ki, yenə də təmkinli və soyuqqanlı idi. Əli ilə futbolçularına işarə verdi. Ondan sonra oyunun taleyi dəyişdi...

Hakimin bu qərarı və oyun boyu etdiyi ədalətsizliklərə "Qarabağ"ın yalnız bir cavabı ola bilərdi - qol vurmaq. Qurbanovun tapşırığı da məhz bu idi. Elə də oldu. Penaltidən iki dəqiqə keçər-keçməz Kamilo Duran dubl edərək "Qarabağ"da bərabərlik qolunu vurdu. Bu, hələ heç nəyin bitmədiyi, inamın hələ də olması demək idi. 

Elə oyunun başlanğıcında stadionda azarkeşlərin açdığı plakat kimi: "Bizim inancımız sizin büdcənizdən daha böyükdür". Bəli, bu işlər büdcə ilə yox, ürəklə olan işlərdir. Əks halda 400 milyondan çox büdcəsi olan "Ayntraxt" qalib gələrdi...

İnandıq, "Qarabağ"a güvəndik, nəticədə isə "köhlən atlar" qalib gəldi. 90+4-cü dəqiqədə Bəhlul Mustafazadə qələbə qolunu vurdu. Bu qol təkcə qələbə qolu yox, ədalətsizliyə qarşı vurulan zərbə idi. 

Onu da deyim ki, 28 yaşlı müdafiəçimiz UEFA Çempionlar Liqasının əsas mərhələsində qol vuran ilk azərbaycanlı futbolçu kimi tarixə düşdü. 
Axı "Qarabağ" ruhunu adını daşıdığı coğrafi ərazimizdən alır. Xalq olaraq ədalətsizliyi nə oyunda, nə siyasətdə qəbul edirik. Elə 44 günlük Vətən müharibəsinə səbəb olan Qarabağ münaqişəsində də belə olmuşdu. 30 il ədalətsizliklə üzləşdik, səbr etdik, nəticədə ədaləti döyüş meydanında öz gücümüzlə bərpa etdik. "Qarabağ"ın oyunçuları da ədaləti oyun meydançasında öz gücləri ilə təmin etdi. Beləliklə, Tofiq Bəhramov adına Respublika Stadionu, həmçinin dünya daha bir tarixi oyuna şahidlik etdi. 

Qurban Qurbanov qazanılan qələbə qarşısında göz yaşlarını saxlaya bilməyib.

Matç Azərbaycan çempionunun 3:2 hesablı qələbəsi başa çatdı. Qurban Qurbanov kimi təmkinli, hisslərini büruzə verməyən şəxs, qazanılan qələbə qarşısında göz yaşlarını saxlaya bilmədi. Gözlərdən çıxan hər damla yaş ədalət tərəzisinin bərqərar olduğunun carçısı idi. 
Bununla da ağdamlılar cari mövsüm Çempionlar Liqasının Liqa mərhələsindəki xallarının sayını 10-a çatdırdılar.