Kapital Bank vətəndaşın kartından necə və hansı əsasla vəsait çıxarır?

Duzxeber.az: - Son dövrlər bank xidmətləri ilə bağlı vətəndaşların narazılığı artmaqdadır. Xüsusilə də əvvəlcədən xəbərdarlıq edilmədən, aydın izah verilmədən “xidmət haqqı” adı altında kart hesablarından vəsaitlərin tutulması cəmiyyətdə ciddi suallar doğurur. Təəssüf ki, belə hallardan biri birbaşa mənim –

"DogruXeber.tv" informasiya portalının baş redaktoru Kamal Əsgərovun başına gəlib.

Belə ki, ötən gün şəxsi bank kartıma mobil tətbiq vasitəsilə nəzarət edərkən balansda “-3 manat” mənfi qalıq qeydə alındığını müşahidə etdim. Kart hesabında ümumiyyətlə vəsait olmadığı halda mənfi balansın yaranması məni dərhal məsələnin səbəbini araşdırmağa vadar etdi.

Bu məqsədlə Kapital Bankın 196 çağrı mərkəzi ilə əlaqə saxladım. Operatorla aparılan dialoq zamanı bildirildi ki, kart balansında vəsait olmadığı üçün 3 manat bank tərəfindən xidmət haqqı kimi tutulub və bu səbəbdən hesabda mənfi qalıq yaranıb. Lakin hansı konkret xidmətə görə bu məbləğin çıxıldığı soruşulduqda operator suala dəqiq və əsaslandırılmış cavab verə bilmədi. Yeganə deyilən isə bunun “kartla bağlı ödəniş” olması idi.

Qeyd edim ki, sözügedən kart uzun illərdir istifadədədir. Bu müddət ərzində kartın dəyişdirilməsi, yenilənməsi, əlavə xidmətlərin qoşulması və ya hər hansı yeni bank əməliyyatı aparılmayıb. Bu halda heç bir rəsmi bildiriş, SMS və ya xəbərdarlıq olmadan vəsaitin tutulması tam haqlı narazılıq doğurur.

Məsələ ilə bağlı etirazımı bildirdikdən sonra operator şikayətin qeydə alındığını və 5 iş günü ərzində araşdırılaraq məlumat veriləcəyini bildirdi. Lakin bundan təxminən bir gün sonra kart balansını yenidən yoxlayarkən həmin 3 manatın Kapital Bank tərəfindən geri qaytarıldığını müşahidə etdim. Bununla belə, bank tərəfindən mənə heç bir rəsmi izahat, zəng və ya yazılı məlumat təqdim olunmadı.

Bu fakt açıq sual yaradır: əgər tutulma qanuni və əsaslı idisə, vəsait niyə izahsız şəkildə geri qaytarıldı?

Hadisə onu göstərir ki, Kapital Bank bəzi hallarda vətəndaşın kart hesabından xəbərdarlıq etmədən vəsait çıxara bilir. Üstəlik, bu əməliyyatlar barədə nə SMS bildirişi göndərilir, nə də mobil tətbiqdə aydın məlumat əks olunur. Əgər kart hesabında kifayət qədər vəsait olsaydı və vətəndaş balansını dəqiq izləməsəydi, bu pulun çıxıldığından ümumiyyətlə xəbəri olmayacaqdı.

Məhz kart hesabında vəsaitin olmaması və balansda mənfi göstəricinin yaranması bu problemin üzə çıxmasına səbəb olub. Əks halda, bu tutulma səssiz şəkildə həyata keçiriləcəkdi.

Bu vəziyyət bank-vətəndaş münasibətlərində şəffaflığın pozulması, istehlakçı hüquqlarının tapdanması və etik normalara zidd davranış kimi qiymətləndirilməlidir. Söhbət burada təkcə 3 manatdan yox, prinsipial və sistemli problemdən gedir.

Qeyd edək ki, qarşıdakı günlərdə bu məsələ ilə bağlı məhkəməyə müraciət edilməsi nəzərdə tutulur. Eyni zamanda ehtimal olunur ki, oxşar hallarla digər vətəndaşlar da qarşılaşıb, lakin ya bunu fərq etməyiblər, ya da araşdırmayıblar.

"DogruXeber.tv" olaraq bu məsələni ictimailəşdirir, aidiyyəti qurumların və hüquq-mühafizə orqanlarının diqqətinə çatdırır və bu kimi halların ciddi şəkildə araşdırılmasını tələb edirik. Banklar anlamalıdır ki, vətəndaşın hesabındakı vəsait onun şəxsi mülkiyyətidir və xəbərdarlıq edilmədən, izahsız şəkildə həmin vəsaitə toxunmaq yolverilməzdir.

"DogruXeber.tv" mövzunu diqqətdə saxlayacaq və araşdırmanın nəticələrini ictimaiyyətə təqdim edəcək.