Səyyar qəbul, yoxsa səyyar görüntü?

Cəbrayıl rayon İcra Hakimiyyətinin başçısı Kamal Həsənovun formal görüşlərinin pərdəarxası

"DogruXeber.tv" xəbər verir ki, 26 yanvar 2026-cı il tarixində Cəbrayıl rayon İcra Hakimiyyətinin başçısı Kamal Həsənov Bakı şəhəri Qaradağ rayonu, Müşfiq qəsəbəsində yerləşən Kazım Məmmədov adına Böyük Mərcanlı kənd tam orta məktəbində növbəti “səyyar görüş-qəbul” keçirib. Rəsmi məlumatlarda bu görüş əhalinin problemlərinin dinlənilməsi, müraciətlərin yerində həlli və sosial rifahın yüksəldilməsinə xidmət edən tədbir kimi təqdim olunur.



Lakin "DogruXeber.tv"nin apardığı araşdırma göstərir ki, bu “səyyar qəbul” da əvvəlkilər kimi yalnız formal xarakter daşıyıb.

Əvvəla, “səyyar görüş” adı altında keçirilən tədbirdə real problemli Cəbrayıl sakinləri iştirak etməyib. Görüşün iştirakçı tərkibinə baxıldıqda aydın olur ki, zal əsasən məktəb kollektivi ilə doldurulub. Halbuki Müşfiq qəsəbəsində məskunlaşmış onlarla Cəbrayıl sakini var ki, onların birinin belə bu görüşdən xəbəri olmayıb.

Bu tip “qəbul”ların necə təşkil edildiyi artıq hamıya bəllidir. DogruXeber.tv-nin əldə etdiyi məlumata görə, Cəbrayıl Təhsil Sektorunun müdiri Zamiq Qurbanov əvvəlcədən məktəb rəhbərliyinə göstəriş verir ki, kollektiv müəyyən edilmiş tarixdə görüşdə iştirak etməlidir. Nəticədə dolanışıq dərdi ilə yaşayan məktəb kollektivi növbəti dəfə iradəsindən asılı olmayaraq bu formal tədbirin iştirakçısına çevrilir.

Bu insanların hansı problemi səsləndirməsi gözlənilir?

Əvvəldən tapşırıqlandırılmış, “susmaq və görüntü yaratmaq” rolunu üzərinə götürmüş kollektiv hansı sosial ağrıdan danışa bilər?

DogruXeber.tv-nin diqqətini çəkən əsas məqam isə rəsmi açıqlamalarda yer alan açıq ziddiyyətlərdir.

Belə ki, bildirilir ki, guya görüş zamanı səsləndirilən problemlərin bir qismi yerində həll olunub, digərləri isə aidiyyəti qurumlara yönləndirilib. Fotomateriallara diqqət yetirildikdə isə bir nəfər də olsun sual verən, problem səsləndirən şəxs görünmür. Bu fakt rəsmi məlumatların həqiqəti əks etdirmədiyini açıq şəkildə ortaya qoyur.

Çünki problemli sakinlər orada olmayıb. Orada yalnız əvvəlcədən prosesə cəlb edilmiş məktəb kollektivi iştirak edib. Onların sosial problemləri dilə gətirməsi mümkün deyil, çünki bu “görüş” problemləri eşitmək üçün yox, hesabat üçün görüntü yaratmaq məqsədi daşıyır.

Beləliklə, Kamal Həsənovun keçirdiyi bu “səyyar qəbul” nə vətəndaşla dialoqdur, nə də real problemlərin həlli istiqamətində atılmış addımdır. Bu, daha çox yuxarı instansiyalara təqdim olunmaq üçün hazırlanmış, administrasiyanı aldatmağa hesablanmış formal bir tədbirdir.

On ildən artıqdır ki, Cəbrayıl rayonuna başçılıq edən Kamal Həsənov illərdir eyni metoddan istifadə edir: şablon çıxışlar, formal görüşlər, reallığı əks etdirməyən hesabatlar. Amma nəticə dəyişmir. Əksinə, bu cür yanaşma cəmiyyətin dövlət məmurlarına olan inamını tamamilə sarsıdır.

Sadə xalq illərdir bu yalançı görüntüləri görür və artıq belə “qəbul”lara zərrə qədər də etibar etmir. Real problemlər həll olunmur, vətəndaşın səsi eşidilmir, yalnız kağız üzərində “uğurlu görüşlər” qalır.

"DogruXeber.tv" bu cür formal tədbirlərin, süni görüntülərin və reallıqdan uzaq hesabatların ifşasını davam etdirəcək və cəmiyyətə həqiqəti çatdırmaqdan çəkinməyəcək.

Bakı şəhəri Qaradağ rayonunda səyyar görüş-qəbul keçirilib