Torpaq zəbt edənlərə XƏBƏRDARLIQ

Duzxeber.az xəbər verir ki, bu barədə məlumat BAKU.WS-in sorğusuna cavab olaraq Əmlak Məsələləri Dövlət Xidmətindən bildirilib.

Xidmətin məlumatına görə, torpaq sahələrinin zəbt edilməsi və qanunazidd istifadəsi ilə bağlı qurumun əməkdaşları tərəfindən ölkə ərazisində mütəmadi monitorinqlər aparılır:

“Azərbaycan Respublikası Prezidentinin 2000-ci il 28 noyabr tarixli 421 nömrəli Fərmanı ilə təsdiq edilmiş “Torpaqlardan istifadəyə və onların mühafizəsinə Dövlət nəzarəti haqqında” Əsasnamənin tələblərinə əsasən İqtisadiyyat Nazirliyi yanında Əmlak Məsələləri Dövlət Xidmətinin (bundan sonra-Xidmət) üzərinə bu sahədə dövlət nəzarətinin həyata keçirilməsi, o cümlədən tikinti işlərinin aparılması ilə müşahidə olunan torpaq sahələrinin zəbt edilməsi və qanunazidd istifadəsinin qarşısının alınması vəzifə olaraq qoyulmuşdur”.

Bildirilir ki, aşağıdakı hallarda akt rəsmiləşdirilir:

“Monitorinq zamanı qanunla müəyyən edilmiş mülkiyyət, istifadə və ya icarə hüququ olmadan torpaq sahələrinin özbaşına tutulması (zəbt edilməsi) ilə nəticələnən tikinti işlərinin aparılması faktları aşkar olunduğu təqdirdə bu hal Xidmətin əməkdaşları tərəfindən müvafiq aktla rəsmiləşdirilir”.
“Bundan sonra, torpaq qanunvericiliyinin pozulması halının xarakterindən asılı olaraq Xidmət tərəfindən torpaq sahələrinin özbaşına tutulması (zəbt edilməsi) hallarının qarşısının alınması üçün tədbir görülməsi məqsədilə yuxarıda qeyd olunan Əsasnamənin 9.5-ci bəndinə əsasən Azərbaycan Respublikasının daxili işlər orqanlarına məlumat verilməsi, habelə Əsasnamənin 11.5-ci bəndinə uyğun olaraq vəzifələri və fiziki şəxsləri qanunvericiliklə müəyyən edilmiş qaydada inzibati məsuliyyətə cəlb edilməsi təmin edilir.

Eyni zamanda, torpaq üzərində aparılan qanunsuz tikinti faktları ilə bağlı toplanmış material səlahiyyətləri daxilində müvafiq tədbirlərin görülməsi məqsədilə Dövlət Şəhərsalma və Arxitektura Komitəsinə, Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinə, rayon (şəhər) icra hakimiyyəti orqanlarına və digər aidiyyəti qurumlara göndərilir”, – deyə məlumatda qeyd olunub.