Azərbaycan İdman Akademiyası (ASA) rektor Fuad Hacıyevin rəhbərlik etdiyi nümayəndə heyəti ilə ilk dəfə “QS Ali Təhsil Sammiti: Avropa 2026”da təmsil olunur.
Sammit çərçivəsində ASA nümayəndələri ali təhsilin gələcəyi, beynəlmiləlləşmə, innovasiya, davamlı inkişaf və universitetlərin qlobal rəqabət qabiliyyətinin artırılması mövzularına həsr olunmuş panel və plenar sessiyalara qatılırlar.
Sözügedən tədbir ASA üçün beynəlxalq tərəfdaşlıq əlaqələrinin genişləndirilməsi, yeni əməkdaşlıqların qurulması və qlobal ali təhsil məkanında mövqeyinin möhkəmləndirilməsi baxımından əhəmiyyət daşıyır. Eyni zamanda, sammit qabaqcıl beynəlxalq təcrübələrin öyrənilməsi, Akademiyanın beynəlxalq görünürlüyünün artırılması və aparıcı ali təhsil müəssisələri ilə əməkdaşlığın inkişaf etdirilməsi üçün əlverişli platforma yaradır.
Qeyd edək ki, ASA 2026-cı ildən etibarən QS təşkilatı ilə əməkdaşlığa başlayıb. Akademiyada QS Stars beynəlxalq qiymətləndirmə sisteminə qoşulmaq istiqamətində müvafiq hazırlıq işləri həyata keçirilir.
ASA-nın bu nüfuzlu beynəlxalq tədbirdə ilk iştirakı Akademiyanın beynəlmiləlləşmə strategiyasının icrası, beynəlxalq akademik nüfuzunun gücləndirilməsi və qlobal ali təhsil şəbəkələrinə inteqrasiyasının genişləndirilməsi istiqamətində atılmış mühüm addım kimi qiymətləndirilir.

Paylaş