XƏBƏRDARLIQ EDİLİR: Piylənmə kişi və qadın orqanizminə...

Türkiyənin Dokuz Eylül Universitetinin alimləri tərəfindən aparılan və "European Association for the Study of Obesity" (EASO) portalında dərc olunan yeni araşdırma, piylənmənin kişi və qadınlarda fərqli xəstəlik riskləri yaratdığını ortaya qoyub.

Duzxeber.az bildirir ki, tədqiqat nəticəsində məlum olub ki, artıq çəkidən əziyyət çəkən kişilərdə daxili orqanları əhatə edən visseral yağların toplanması daha çox müşahidə olunur ki, bu da birbaşa ürək-damar və metabolik pozuntulara yol açır. Qadınlarda isə piylənmə fonunda daha çox yüksək xolesterin səviyyəsi və kəskin iltihabi proseslər qeydə alınır ki, bu da öz növbəsində diabet və ürək xəstəliklərinin inkişaf ehtimalını artırır.
Araşdırmanın müəllifi Zeynep Pekel bildirib ki, 1100-dən çox xəstənin məlumatlarının təhlili cinslər arasındakı fərqlərin fəsadların yaranmasında mühüm rol oynadığını sübut edir. Belə ki, bədən kütlə indeksi eyni olsa da, kişilərdə bel çevrəsinin ölçüsü və qan təzyiqi göstəriciləri daha yüksək çıxıb, həmçinin onlarda qaraciyər fermentləri və triqliseridlərin artması kimi maddələr mübadiləsi pozuntuları daha tez-tez aşkarlanıb. Qadınlarda isə "pis" xolesterinin səviyyəsinin yüksək olması və sistemli iltihab markerlərinin mövcudluğu fəsadların immunitet sistemi ilə bağlı fərqli bir mexanizm üzrə inkişaf etdiyini göstərir.

Mütəxəssislər bu fərqləri hormonların təsiri ilə əlaqələndirirlər; qadın cinsi hormonları yağın paylanmasına və iltihab reaksiyalarına təsir etdiyi halda, kişilərdə piy toxuması əsasən daxili orqanların ətrafında cəmləşir. Alimlər vurğulayırlar ki, əldə olunan bu yeni məlumatlar gələcəkdə piylənmənin müalicəsində xəstənin cinsini nəzərə alan daha dəqiq və fərdiləşdirilmiş metodların hazırlanmasına imkan verəcək. Bununla belə, nəticələrin daha geniş kütlələr üzərində təsdiqlənməsi üçün əlavə tədqiqatların aparılmasına ehtiyac olduğu qeyd edilir.//32gun.az