Cənubi Koreyada sabiq prezidentə həbs tələbi - Prokurorluqdan ittiham

Cənubi Koreyada xüsusi səlahiyyətli prokurorluq sabiq prezident Yoon Suk Yeol barəsində "yalançı şahidlik” ittihamı ilə 2 il həbs cəzası tələb edib.

Duzxeber.az-in "Yonhap” agentliyinə istinadən məlumatına görə, prokurorluq Yoonun 2024-cü ilin dekabrında hərbi vəziyyət elanından əvvəl keçirilən Nazirlər Kabineti iclası ilə bağlı yanlış təsəvvür yaratdığını bildirir. İddia olunur ki, o, bu iclasın keçmiş baş nazir Han Dak - sunun təklifindən əvvəl planlaşdırıldığı görüntüsü yaradıb.

Xatırladaq ki, Yoon Suk Yeol 2024-cü ilin noyabrında Han Dak - sunun işi üzrə məhkəmədə şahid qismində ifadə verib. Ona Nazirlər Kabineti iclasının hərbi vəziyyəti legitimləşdirmək məqsədilə keçirilib-keçirilmədiyi ilə bağlı sual ünvanlanıb. Yoon isə bu iddiaları rədd edərək, iclas iştirakçılarının "sadəcə görüntü üçün çağırılmadığını” bildirib.

Prokurorluq isə əksinə, Yoonun əvvəlcə belə bir iclas keçirməyi planlaşdırmadığını, lakin vəziyyəti əsaslandırmaq üçün sonradan bu addımı atdığını irəli sürür.


Qeyd edək ki, Yoon Suk Yeol 3 dekabr 2024-cü ildə müxalifəti "dövlətə qarşı fəaliyyətlərdə iştirak etməkdə” ittiham edərək hərbi vəziyyət elan etmişdi. Lakin Milli Assambleya bu qərarı ləğv etdikdən sonra o, geri addım atmağa məcbur olmuşdu.

Daha sonra, 14 dekabr 2024-cü ildə parlamentdə keçirilən səsvermə ilə onun impiçmenti qəbul edilib və o, müvəqqəti olaraq vəzifəsindən uzaqlaşdırılıb. 4 aprel 2025-ci ildə Konstitusiya Məhkəməsi bu qərarı təsdiqləyərək Yoo-un prezident səlahiyyətlərinə xitam verib.

Onun vəzifədən kənarlaşdırılmasından sonra keçirilən seçkilərdə müxalif Demokratik Partiyanın namizədi Li Jae-myunq qalib gələrək 4 iyun 2025-ci ildə prezident vəzifəsinin icrasına başlayıb.