Təhsildə rəqəmsallaşma iflasa uğrayıb – Dosent İlham Əhmədov

Prezident tərəfindən “Azərbaycan Respublikasında rəqəmsallaşma, elektron hökumət, süni intellekt və innovasiya sahələrində fəaliyyətin təkmilləşdirilməsi ilə bağlı bəzi tədbirlər haqqında” yeni fərman imzalanıb.
Fərmana əsasən, ölkədə rəqəmsal inkişafın prioritet istiqamətlərinin müəyyənləşdirilməsi, milli texnoloji potensialın gücləndirilməsi, rəqəmsal suverenliyin möhkəmləndirilməsi və innovasiya əsaslı iqtisadi modelə keçidin sürətləndirilməsi nəzərdə tutulur. Eyni zamanda, bu sahədə dövlət siyasətinin vahid və əlaqələndirilmiş şəkildə həyata keçirilməsi məqsədilə Azərbaycan Respublikasının Rəqəmsal İnkişaf Şurası yaradılacaq.
Duzxeber.az xəbər verir ki, məsələ ilə bağlı dosent İlham Əhmədov bildirib ki, bu fərman son bir ildə rəqəmsal iqtisadiyyata keçidlə əlaqədar qəbul edilmiş sənədlərin məntiqi davamıdır və ölkənin postneft dövrünə keçid strategiyasına xidmət edir.
Onun sözlərinə görə, bu istiqamətdə layihələrin icrasında Elm və Təhsil Nazirliyinin (ETN) xüsusi rolu olmalıdır:
“Belə elmi-texnoloji yönümlü dövlət layihələrinin səmərəliliyi ölkədə rəqəmsal insan kapitalının səviyyəsindən birbaşa asılıdır”.
Ekspert hesab edir ki, Azərbaycanda son 25 ildə insan kapitalının formalaşdırılması və təhsilin rəqəmsallaşması sahəsində ciddi nəticələr əldə olunmayıb. O qeyd edib ki, həyata keçirilən informasiyalaşdırma proqramları sistemsiz, səmərəsiz və yarımçıq olub, bu isə təhsilin inkişafına gözlənilən təsiri göstərməyib.
İlham Əhmədovun fikrincə, ölkədə hələ də tam funksional distant təhsil sistemi qurulmayıb:
“Biz regionda yeganə ölkəyik ki, normal distant təhsil sistemi yarada bilməmişik. Halbuki, təhsil sistemi tez-tez məcbur qalaraq bu texnologiyaya müraciət edir”.
Dosent həmçinin ETN-in hazırkı idarəetmə heyətinin bu səviyyəli strateji məsələlərin həlli üçün peşəkarlıq baxımından yetərli olmadığını vurğulayıb.
Fərmanda isə qeyd olunur ki, rəqəmsal inkişaf sahəsində fəaliyyətin gücləndirilməsi üçün yerli və xarici ekspertlər, beynəlxalq təşkilatlar və elmi müəssisələrin cəlb olunması ilə işçi qruplar yaradılacaq.
İlham Əhmədov bildirib ki, bu istiqamətdə konkret təkliflər yaxın mərhələlərdə ictimaiyyətə təqdim ediləcək.//Tribuna.az