Ukrayna Prezidenti İlham Əliyevi təbrik etdi

BAKI, Azərbaycan, 27 may. DuzXeber.az-ın məlumatına görə , Ukrayna Prezidenti Vladimir Zelenski Azərbaycan Respublikasının Prezidenti İlham Əliyevə təbrik məktubu göndərib .
"Zati-aliləri,
Sizi və Azərbaycan xalqını ölkənizin Müstəqillik Günü münasibətilə ürəkdən təbrik edirəm.
İldən-ilə Azərbaycan regional və beynəlxalq məsələlərdə rolunu və nüfuzunu davamlı olaraq artıraraq enerji, logistika və iqtisadi sektorlarda regional əməkdaşlığın vacib iştirakçısı kimi dinamik inkişaf nümayiş etdirir.
Ukrayna ölkələrimiz arasındakı münasibətlərin strateji xarakterini və bu olduqca çətin dövrdə Azərbaycanın dövlətimizə, eləcə də Ukrayna xalqına göstərdiyi davamlı dəstəyi yüksək qiymətləndirir.
Ukraynaya göstərdiyiniz humanitar və enerji yardımına, İrpin şəhərinin yenidən qurulmasında fəal iştirakınıza və ukraynalı uşaqlar üçün reabilitasiya və sağlamlıq proqramlarının həyata keçirilməsinə görə Sizə xüsusi təşəkkürümü bildirirəm. Bu addımlar xalqlarımız arasında həqiqi həmrəyliyin və qarşılıqlı hörmətin əsl təzahürüdür.
Ukrayna beynəlxalq səviyyədə tanınmış sərhədləri daxilində dövlətlərin suverenliyini, müstəqilliyini və ərazi bütövlüyünü daim dəstəkləyir. Əminəm ki, bu fundamental prinsiplərə riayət etmək Qara dəniz-Xəzər regionunda sabitliyin və təhlükəsizliyin təməli kimi xidmət etməyə davam edəcək.
Əminəm ki, Ukrayna və Azərbaycan arasında enerji və logistika sektorlarında, eləcə də nəqliyyat bağlantısı, infrastruktur və təhlükəsizlik sahələrində əməkdaşlığın daha da inkişaf etdirilməsi üçün böyük potensial var. Qlobal enerji və təchizat zənciri marşrutlarının davam edən transformasiyası fonunda dövlətlərimizin regional qarşılıqlı əlaqənin təmin edilməsindəki rolu və dayanıqlığı yalnız artmaqda davam edəcək. Qətiyyətlə inanıram ki, Ukrayna-Azərbaycan strateji tərəfdaşlığı millətlərimizin və xalqlarımızın mənafeyi naminə daha da güclənəcək.
Hörmətli cənab Prezident, Sizə möhkəm cansağlığı və ali dövləti fəaliyyətinizdə davamlı uğurlar arzulayıram", - deyə məktubda bildirilir./trend