Ermənistanda seçkidən sonra vətəndaş müharibəsi başlayacaq – SENSASİON DETALLAR

İyunun 7-də keçiriləcək parlament seçkiləri Ermənistanda adi siyasi kampaniya çərçivəsini aşaraq geosiyasi qarşıdurma mərhələsinə keçib. Söhbət artıq yalnız hakimiyyət uğrunda mübarizədən deyil, ölkənin gələcək siyasi kursundan, regiondakı qüvvələr nisbətindən və Ermənistanın hansı istiqamətdə hərəkət edəcəyindən gedir.

DuzXeber.az "bakupost"-a istinadla xəbər verir ki, “1news.az”ın əldə etdiyi məlumatlara görə, seçkilərdən sonra Ermənistanı vətəndaş müharibəsinə sürükləmək istiqamətində genişmiqyaslı plan həyata keçirilir.


Xarici ölkələrdən kütləvi axın – hibrid müdaxilə


Nəşrin yazdığına görə, Baş nazir Nikol Paşinyanın rəhbərlik etdiyi hakimiyyət Qərbə inteqrasiyanı sürətləndirməyə, yeni Konstitusiya qəbul etməyə və köhnə revanşist siyasi doktrinalardan imtina etməyə çalışdığı bir vaxtda, xarici qüvvələr və onlarla əlaqəli radikal dairələr ölkədə vəziyyəti qarışdırmaq üçün hazırlıqlara başlayıblar.


Ümumilikdə Rusiyada yaşayan 100-150 min Ermənistan vətəndaşı seçkilər ərəfəsində Ermənistana göndərilib.


Sözügedən şəxslərin əsas missiyası yalnız səsvermədə iştirak etmək deyil. Məqsəd seçki günü və ondan sonrakı dövrdə İrəvanda kütləvi etiraz aksiyaları təşkil etmək, dövlət qurumlarının fəaliyyətini iflic etmək və nəticədə ölkədə vətəndaş qarşıdurmasına qədər gedə biləcək xaos yaratmaqdır.


Ermənistanın yetərsiz cavab tədbirləri


Ermənistan hakimiyyəti də bu təhlükəni nəzərə alaraq əks tədbirlərə başlayıb. Xüsusilə, İrəvanın Zvartnots beynəlxalq hava limanı xüsusi iş rejiminə keçirilib. Erməni mediasının yazdığına görə, Rusiyadan gələn və hərbi xidmətə yararlı hesab edilən kişilər hava limanında hərbi komissarlıqların və hərbi polisin əməkdaşları tərəfindən qeydiyyata alınır.



Ermənistan Müdafiə Nazirliyi bunu ehtiyatda olan vətəndaşların qeydiyyatı ilə izah etsə də, faktiki olaraq həmin şəxslərə 25 günlük hərbi təlimlərə çağırış vərəqələri təqdim olunur və onlar hərbi hissələrə göndərilirlər.




Hakim "Vətəndaş Müqaviləsi" partiyasının nümayəndələrinin açıqlamalarına əsasən, bu mexanizm vasitəsilə Rusiyadan gələn 30-40 min nəfərin müxtəlif hərbi hissələrə yönləndirilməsi nəzərdə tutulur.


Rusiyanın İran və Gürcüstan üzərindən gizli müdaxilə sxemi


Lakin Rusiyadan Ermənistana birbaşa hava marşrutlarının Paşinyan hakimiyyətinin xüsusi xidmət orqanlarının ciddi nəzarətində olması səbəbindən təşkilatçılar alternativ yollar seçiblər. Məlumata görə, Rusiyada yaşayan Ermənistan vətəndaşlarının əhəmiyyətli hissəsi əvvəlcə avtomobillərlə Gürcüstana gəlir, burada müxtəlif hotellərdə yerləşdirilir, daha sonra isə kiçik qruplar şəklində Ermənistan sərhədini keçir.



Üstəlik, hibrid əməliyyat sadəcə Gürcüstan üzərindən həyata keçirilmir. Belə ki, Ermənistan polis qüvvələrini bir neçə coğrafi cəbhəyə yaymağa çalışan prosesin təşkilatçıları digər yollara da əl atıblar.




Radikal Daşnaksütyun partiyasının funksionerləri arasında əsas rol oynayan erməni diasporunun Avropa qanadının nümayəndələri də kütləvi surətdə Ermənistana gəlir. Bundan əlavə, İran üzərindən də dəstək qrupları Ermənistana axın edir. Bu qrupların bir hissəsi artıq paytaxt İrəvana sızmağı bacarıblar.


Gümrü planı: Silahlı radikallar qarşıdurmaya hazırlanır


Prosesə cəlb olunan daha hazırlıqlı, xüsusi təcrübə keçmiş şəxslərin bir hissəsi isə birbaşa Gümrüdəki Rusiya hərbi bazasına yönləndirilir. Həmin baza ekstraterritorial statusa malik olduğu üçün, Ermənistan hüquq-mühafizə orqanlarının müdaxilə imkanı yoxdur və burada radikal qrupların koordinasiyasını həyata keçirmək xeyli asandır.



Üstəlik, Gümrüdəki bazada yerləşdirilən radikal yaraqlıların müəyyən olunmuş saatda silahlanmış şəkildə küçələrə çıxması nəzərdə tutulur. Göründüyü kimi, əsas plan seçkilərin nəticələrini tanımamaq və küçə etirazlarına başlamaqdır.




Ssenariyə diaspordan olan kütlənin hücum edərək inzibati binaları ələ keçirməsi, etirazçıların kütləvi iğtişaşlar törətməsi, siyasi zorakılıq və silahlandırılmış radikalların ölkəni uzunmüddətli daxili qarşıdurmaya – vətəndaş müharibəsinə sürükləməsi daxildir.


Ermənistanda vətəndaş müharibəsi təhlükəsi


Qeyd edək ki, sözügedən ssenariyə bənzər vəziyyət Ermənistanda əvvəlki illərdə də yaşanıb. Ermənistanın siyasi tarixində parlamentin silahlı basqına məruz qalması, dövlət obyektlərinin tutulması və digər zorakı hadisələr baş verib. Bu isə hazırki vəziyyətdə bənzər ssenarilərin tamamilə real təhlükə kimi qiymətləndirilməsinə imkan verir.


Görünüyü kimi, iyunun 7-də keçiriləcək parlament seçkiləri Ermənistan üçün sadəcə hakimiyyət uğrunda mübarizə deyil, həm də ölkənin sabitliyi və gələcək inkişaf istiqaməti baxımından ciddi sınaq olacaq. Ona görə də, seçkilərin nəticəsindən asılı olmayaraq, qarşıdakı günlər Ermənistanın gələcək taleyini müəyyən edə bilər.