Qaraçuxurda qanunsuz tikintiyə dövlət qurumları niyə göz yumur?

Aparılan tikinti barədə Dövlət Şəhərsalma və Arxitektura Komitəsinin icazəsi yoxdur


Duzxeber.az: - Paytaxtın Qaraçuxur qəsəbəsi ərazisində qanunsuz tikinti ilə bağlı növbəti qalmaqallı məlumat daxil olub. Məlumata görə, Sakit Qocayev küçəsinin yaxınlığında yerləşən ərazidə heç bir rəsmi icazə olmadan tikinti və artırma işləri aparılır. Hazırda ərazidə tikinti prosesinin davam etdiyi, obyektin qanunsuz şəkildə genişləndirildiyi bildirilir. Məsələ ilə bağlı apardığımız ilkin araşdırmalar zamanı məlum olub ki, Dövlət Şəhərsalma və Arxitektura Komitəsinin şəhərsalma məlumat bazasında sözügedən tikinti ilə bağlı hər hansı icazə sənədi və ya rəsmi qeyd mövcud deyil. Bu isə tikinti işlərinin qanunsuz aparılması ehtimalını daha da gücləndirir. Sual doğuran əsas məqam isə budur ki, paytaxt ərazisində açıq-aşkar aparılan bu tikinti işlərini görəsən aidiyyəti qurumlar necə görmür? Axı tikinti fəaliyyətinə nəzarət bir neçə dövlət qurumunun səlahiyyətinə daxildir.


Mediatv.az xəbər verir ki, Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi, Dövlət Şəhərsalma və Arxitektura Komitəsi, eləcə də İqtisadiyyat Nazirliyi yanında Əmlak Məsələləri Dövlət Xidməti bu cür halların qarşısını almağa borcludur. Əgər rəsmi icazə yoxdursa, o halda sual yaranır, bu tikinti kimə arxayın olaraq aparılır? Niyə aidiyyəti qurumlar qanunsuz tikinti faktına operativ reaksiya vermir? Yoxsa paytaxtın bəzi ərazilərində qanunlar formal tətbiq olunur? Qeyd edək ki, qanunvericiliyə əsasən icazəsiz tikinti işlərinin aparılması qanun pozuntusu hesab olunur və belə hallarda tikinti dərhal dayandırılmalı, qanunsuz tikili sökülməli və məsul şəxslər barəsində tədbir görülməlidir. Lakin görünən odur ki, Qaraçuxur qəsəbəsində bu qaydalar ya unudulub, ya da bilərəkdən gözardı edilir.


Qarşı tərəfin cavab haqqını tanıyırıq.