İran–ABŞ müharibəsində razılaşma ümidləri: Tehran öz şərtlərini irəli sürdü

ABŞ və İranın silahların susması üçün bir-birindən istədiyi şərtlər aydınlaşır. Tehranın ABŞ-ın təqdim etdiyi atəşkəs təklifinə ilk cavabı mənfi olub və öz şərtlərini irəli sürüb.

Duzxeber.az xəbər verir ki, İranın Press TV kanalı İranlı mənbəyə istinadən yaydığı xəbərdə Tehranın ABŞ-ın təqdim etdiyi atəşkəs təklifini qiymətləndirdiyi və onu həddindən artıq hesab etdiyi bildirilib.

Reuters də İranlı yüksək vəzifəli şəxslərə istinadən Tehranın ABŞ-ın təklifinə ilk cavabının mənfi olduğunu, lakin təklifin hələ də araşdırıldığını bildirib.

İRAN ÖZ ŞƏRTLƏRİNİ İRƏLİ SÜRDÜ
İranın Press TV kanalı İranlı rəsmilərə istinadən yaydığı xəbərdə Tehranın ABŞ-a şərtlərini açıqladığı qeyd olunub.
İran müharibənin başa çatması üçün ABŞ və İsrailin hücum və sui-qəsdlərdən imtina etməsini istəyir.
Tehran iyun ayında baş verən 12 günlük müharibə də daxil olmaqla, oxşar hadisələrin təkrarlanmaması üçün konkret zəmanətlər tələb edir.
İranın şərtləri arasında ABŞ və İsrailin müharibə təzminatı ödəməsi də var.
İran yalnız öz ərazisinə deyil, müqavimət oxuna daxil olan qruplara qarşı hücumların da dayandırılmasını istəyir.
Sonda Hörmüz boğazında İranın suveren hüquqlarının tanınması Tehranın şərtləri arasında yer alır.

İRANIN SƏFİRİNDƏN “DİALOQ YOXDUR” AÇIQLAMASI
Lakin İranın IRNA xəbər agentliyi İranın Pakistandakı səfirinin ABŞ ilə İran arasında birbaşa və ya dolayı heç bir danışıqların olmadığını dediyini açıqlayıb. Elçinin “Pakistan kimi dost ölkələrin Tehran və Vaşinqton arasında dialoq mühiti yaratmağa çalışdığını” və bu cəhdlərin müharibənin başa çatmasına kömək edə biləcəyini ümid etdiyini bildirdiyi qeyd olunub.
Digər tərəfdən, Anadolu Agentliyinə danışan Pakistanlı mənbələr “Zəmanət axtaran İran, raket imkanlarının məhdudlaşdırılmasını rədd edir və təzminat istəyir.” ifadələrini işlədib və danışıqlar üçün 48 saat ərzində addım gözlənildiyini bildirib.

ABŞ-IN 15 MADDƏLİ PLANININ DETALLARI
ABŞ İranın mövcud nüvə imkanlarının aradan qaldırılmasını istəyir. Bundan əlavə, Vaşinqton İranın heç vaxt nüvə silahı əldə etməyəcəyinə dair öhdəlik verməsini, uranın zənginləşdirilməsinin dayandırılmasını, bütün zənginləşdirilmiş materialların təhvil verilməsini tələb edir. Natanz, İsfahan və Fordo nüvə obyektlərinin fəaliyyətinin dayandırılması və məhv edilməsi, Atom Enerjisi Agentliyinin İran daxilində bütün məlumatlara çıxış əldə etməsi də tələb olunan maddələr arasındadır.
ABŞ-ın həmçinin İranın bölgədəki silahlı qruplara dəstəyindən imtina etməsini, bu qrupları maliyyələşdirməyi və silahlandırmağı dayandırmasını tələb etdiyi iddia olunur.