Azərbaycan İdman Akademiyasında orqan donorluğu ilə bağlı maarifləndirici tədbir

Azərbaycan İdman Akademiyasında (ASA) Səhiyyə Nazirliyi ilə Elm və Təhsil Nazirliyinin birgə əməkdaşlığı çərçivəsində ali təhsil müəssisələrində həyata keçirilən orqan donorluğu və transplantasiya mövzusunda maarifləndirici tədbir təşkil olunub.

Duzxeber.az xəbər verir ki,“Donor ol, həyat bəxş et” adlı tədbiri giriş sözü ilə açan Akademiyanın keyfiyyət təminatı və ömürboyu təhsil üzrə prorektoru Rafail Novruzov orqan donorluğunu cəmiyyət üçün aktual sosial məsuliyyət mövzularından biri kimi dəyərləndirib. 

Səhiyyə Nazirliyinin Orqan Donorluğu və Transplantasiya Mərkəzinin İdarə Heyəti sədrinin müavini Ağababa Nəsirov çıxışında orqan donorluğunun insan həyatının xilas edilməsində mühüm rol oynadığını vurğulayıb.

Tələbələrlə iş üzrə prorektorun müşaviri Lalə Əhmədova gənclərin bu istiqamətdə maarifləndirilməsinin vacibliyini diqqətə çatdırıb. Sağlamlıq və menecment fakültəsinin dekan müavini Ahu-Müjgan Muradova isə təşəbbüsün yalnız tibbi deyil, eyni zamanda etik və mənəvi məsuliyyət daşıdığını, insanlıq və mərhəmət dəyərlərini təcəssüm etdirdiyini bildirib.

Daha sonra Mərkəzin həkim-koordinatoru Mehriban Əliyeva donor olmaq üçün tələb olunan tibbi göstəricilər, müayinə prosesi, həmçinin bu sahədə tətbiq olunan tibbi-hüquqi yeniliklər haqqında ətraflı məlumat verib.

Sonda mövzu ətrafında fikir mübadiləsi aparılıb, tələbələrin çoxsaylı sualları cavablandırılıb.//32gun.az