Türkiyədə DEAŞ terror təşkilatına qarşı genişmiqyaslı əməliyyat: 90 şübhəli saxlanıldı

Türkiyə Daxili İşlər Nazirliyi ölkənin 24 vilayətində Jandarma qüvvələri tərəfindən DEAŞ terror təşkilatına qarşı keçirilən əməliyyatlarda 90 nəfərin yaxalandığını açıqlayıb.
Duzxeber.az bildirir ki, Nazirliyin sosial media hesabında edilən paylaşımda bu uğurlu əməliyyatın təfərrüatlarına dair məlumatlar verilib. Jandarma Baş Komandanlığının Terrorla Mübarizə (TEM) İdarəsi və respublika prokurorluqlarının koordinasiyası ilə həyata keçirilən bu genişmiqyaslı tədbirlər nəticəsində DEAŞ terror təşkilatına üzv olan, sözdə yardım qurumları vasitəsilə təşkilata maliyyə dəstəyi göstərən, həmçinin sosial media üzərindən terror təbliğatı aparan şəxslər ələ keçirilib. Nazirlik bəyan edib ki, DEAŞ-ın fəaliyyətinə və maliyyə strukturlarına qarşı mübarizə qətiyyətlə davam etdiriləcək, eyni zamanda əməliyyatı həyata keçirən bütün qurum və şəxslərə təşəkkürünü bildirib.