QHT-lərə Dövlət Dəstəyi Agentliyi ifşa olunur: reklam təşkilatının nikah layihəsinə dəstək -FOTOLAR

Duzxeber.az: - Bu faktlar hüquq-mühafizə orqanları tərəfindən ciddi və obyektiv şəkildə araşdırılmalıdır. Əks halda, cəmiyyətdə haqlı olaraq belə bir fikir formalaşır ki, QHT-lərə Dövlət Dəstəyi Agentliyinin qərarlarına bilərəkdən göz yumulur və bu qurum faktiki olaraq toxunulmaz elan edilib.

QHT-lərə Dövlət Dəstəyi Agentliyinin 2025-ci il üzrə qrant müsabiqəsinin nəticələrinin təhlili zamanı qarşımıza çıxan faktlar artıq təsadüf və ya texniki səhv kimi izah edilə bilməz. Bu faktlar QHT-lərə Dövlət Dəstəyi Agentliyində qrantların hansı prinsiplərlə bölüşdürüldüyünü, dövlət vəsaitinin necə xərcləndiyini və bu prosesdə şəxsi münasibətlərin hansı rol oynadığını açıq şəkildə ortaya qoyur.

Söhbət “Reklam və Marketinq Sahəsinin İnkişafına Dəstək” İctimai Birliyinin təqdim etdiyi “Xoşbəxtlik nikahla yox – təhsillə başlayır!” adlı layihədən gedir. Layihə QHT-lərə Dövlət Dəstəyi Agentliyinin 2025-ci il qrant müsabiqəsində qalib elan edilib və ona 9 min manat dövlət vəsaiti ayrılıb.

Məsələnin mahiyyəti layihənin mövzusunun cəmiyyət üçün faydalı olub-olmamasında deyil. Əgər söhbət erkən nikahların qarşısının alınmasından, təhsilin təşviqindən gedirsə, bu, əlbəttə ki, ictimai baxımdan müsbət təşəbbüsdür. Problem ondadır ki, bu layihə onu təqdim edən QHT-nin nizamnaməsi ilə heç bir əlaqəyə malik deyil...

“Reklam və Marketinq Sahəsinin İnkişafına Dəstək” İctimai Birliyi rəsmi saytında və nizamnaməsində açıq şəkildə bəyan edir ki, təşkilatın əsas məqsədi reklam və marketinq bazarında sağlam rəqabət mühitinin formalaşdırılmasıdır. QHT öz fəaliyyət istiqamətlərini də konkret göstərir: reklam və marketinq sahəsində dövlət siyasətinin təbliği, bu sahədə müasir texnologiyaların və yanaşmaların tətbiqi, araşdırmaların aparılması, beynəlxalq təcrübənin öyrənilməsi və bu sahədə maarifləndirmə işlərinin görülməsi.



Bu sənədlərdə nə erkən nikah, nə təhsil siyasəti, nə sosial-mənəvi problemlər, nə də ailə münasibətləri ilə bağlı bir cümlə belə yoxdur. Buna baxmayaraq, bu QHT tamamilə fərqli bir mövzuda layihə hazırlayır, QHT-lərə Dövlət Dəstəyi Agentliyinə təqdim edir və həmin layihə heç bir sual doğurmadan maliyyələşdirilir.

QHT-lərə Dövlət Dəstəyi Agentliyinin rəhbərliyi və məsul şəxsləri hər dəfə çıxışlarında, müsahibələrində və rəsmi tədbirlərdə pafosla bildirirlər ki, layihələr ciddi şəkildə qiymətləndirilir, QHT-lərin nizamnamə məqsədlərinə uyğunluq əsas meyarlardan biridir, dövlət vəsaiti yalnız hüquqi çərçivədə xərclənir. Lakin faktlar bu bəyanatların real vəziyyətlə heç bir əlaqəsinin olmadığını göstərir.



Əgər QHT-lərə Dövlət Dəstəyi Agentliyində layihələr doğrudan da ciddi təhlil edilirsə, bu layihə hansı əsasla müsabiqədən keçib? Əgər nizamnaməyə uyğunluq yoxlanılırsa, reklam və marketinq yönümlü bir QHT-nin sosial-ideoloji mövzuda layihəsi necə təsdiqlənib? Bu sualların cavabı yoxdur.
Daha da narahatedici məqam ondan ibarətdir ki, Ədliyyə Nazirliyi də bu prosesdə faktiki olaraq passiv mövqe tutur. Layihələr üzrə bildirişlər verilir, lakin QHT-nin nizamnaməsi ilə təqdim etdiyi layihə arasında uyğunluq yoxlanılmır. Beləliklə, iki dövlət qurumu – biri maliyyələşdirən, digəri hüquqi nəzarəti həyata keçirən qurum – eyni uyğunsuzluğa göz yumur. Bu isə artıq sistemli problemdir.

Yenixeber.org-a daxil olan məlumatlar sırasında daha maraqlısı bu QHT-nin rəhbərinin kimliyi və kimə bağlılığıdır... Rəsmi sənədlərdə QHT-nin sədri Xəyalə Mütəllimova göstərilsə də, təşkilatın faktiki təsir imkanlarının media sahəsində tanınan şəxs – “Yurd FM” və “Media FM” radiostansiyalarının rəhbəri Rüstəm Əliyevlə bağlı olduğu məlum oldu. Qeyd edək ki, həmin radioların yaradılması və fəaliyyətə başlaması da vaxtilə Prezident Administrasiyasının sabiq şöbə müdiri Elnur Aslanovun adı ilə bağlı idi(?)

Burada diqqət çəkən daha bir məqam QHT-lərə Dövlət Dəstəyi Agentliyinin fəaliyyətinə nəzarət edən Tural Əliyevin keçmişdə məhz “Yurd FM” radiosunda, Rüstəm Əliyevin rəhbərliyi altında çalışmasıdır. Sözsüz ki, bu fakt ayrıca götürüldükdə hüquq pozuntusu kimi qiymətləndirilə bilməz. Lakin bu əlaqələr fonunda reklam yönümlü bir QHT-nin nizamnaməsinə zidd layihəsinin problemsiz şəkildə maliyyələşdirilməsi artıq təsadüf kimi görünmür.

Burada əsas məsələ kiminsə harada işləməsi və ya kimin hansı QHT-də təmsil olunması deyil. Əsas məsələ ondan ibarətdir ki, keçmiş əlaqələr bu gün dövlət vəsaitinin bölüşdürülməsində rol oynayırmı? Əgər oynamırsa, bu qədər açıq uyğunsuzluqlar necə izah olunur?

Faktiki olaraq QHT Şurası dövründən qalma “dost-tanış”, “keçmiş iş yoldaşı”, “şəxsi əlaqə” mexanizmlərinin QHT-lərə Dövlət Dəstəyi Agentliyində daha da dərinləşdiyi müşahidə olunur. Hər il fərqli QHT-lərdə, fərqli layihələrdə eyni qanunsuzluqlar üzə çıxır. Bu isə artıq fərdi səhv deyil, idarəetmə problemidir.

Dövlət büdcəsindən ayrılan vəsait şəxsi münasibətlərin, qeyri-rəsmi əlaqələrin və nizamnaməyə zidd yanaşmaların qurbanına çevrilməməlidir. Bu, təkcə QHT sektorunun problemi deyil, dövlət idarəçiliyinin əsas prinsiplərinə ziddir.

Bu faktlar hüquq-mühafizə orqanları tərəfindən ciddi və obyektiv şəkildə araşdırılmalıdır. Əks halda, cəmiyyətdə haqlı olaraq belə bir fikir formalaşır ki, QHT-lərə Dövlət Dəstəyi Agentliyinin qərarlarına bilərəkdən göz yumulur və bu qurum faktiki olaraq toxunulmaz elan edilib.

Bu cür yanaşma dövlətə, dövlət institutlarına və şəffaflıq prinsipinə birbaşa zərbədir.(Yenixeber.org)

Yazıda adları hallanan tərəflərin cavab haqqını tanıyırıq.