Ermənistanda seçkilərdə iştirak faizi 59 faizə yaxın olub

Ermənistanda keçirilən parlament seçkilərində seçici fəallığı 58,97 faiz təşkil edib.
Duzxeber.az xəbər verir ki, bu barədə ölkənin Mərkəzi Seçki Komissiyası məlumat yayıb.
Rəsmi məlumatlara əsasən, səsvermədə ümumilikdə 1 milyon 476 min 597 nəfər iştirak edib.
MSK-nın açıqlamasında bildirilir ki, bu göstərici son doqquz ilin parlament seçkiləri üzrə ikinci ən yüksək nəticə hesab olunur.
Qeyd edək ki, Ermənistanda bundan əvvəl 2017-ci ildə keçirilən parlament seçkilərində seçici fəallığı 60,85 faiz olmuşdu.
Hazırda məntəqə seçki komissiyalarında səslərin sayılması prosesi davam edir. Seçkilərin ilkin nəticələrinin yaxın saatlarda açıqlanacağı gözlənilir.
***
20:12
Ermənistanda Milli Məclisə keçirilən seçkilər üzrə səsvermə prosesi yekunlaşıb.
DuzXeber.az xəbər verir ki, seçki məntəqələri Moskva vaxtı ilə saat 19:00-da (yerli vaxtla 20:00-da) bağlanıb.
Səsvermənin başa çatmasından sonra məntəqə seçki komissiyalarının üzvləri səslərin sayılmasına başlayıblar.
Mərkəzi Seçki Komissiyasının məlumatına görə, saat 20:00-da seçici fəallığı ilə bağlı ilkin göstəricilər ictimaiyyətə təqdim olunacaq.
Qeyd edək ki, seçkilərdə iştirak üçün 16 siyasi partiya və 2 seçki bloku qeydiyyatdan keçmişdi. Rəsmi məlumatlara əsasən, ölkədə 2,5 milyondan çox vətəndaş səsvermə hüququna malikdir.
İlkin nəticələrin iyunun 8-də açıqlanacağı gözlənilir.