Azərbaycan və Ermənistan qazilərə nə qədər aylıq verir? - Müqayisə heyrətləndirdi

Duzxeber.az:  Bakupost.az xəbər verir ki, bununla bağlı mühacir jurnalist Elbəyi Həsənli maraqlı qarşılaşdırma aparıb.
O bildirib ki, Azərbaycanda 44 günlük müharibənin sıravi iştirakçısı olan qaziyə dövlətin verdiyi əsas aylıq müavinət 80 manatdır (47 dollar). Əlillik statusu olan qazilər üçün vəziyyət nisbətən fərqlidir: əlil qazilər üçün aylıq pensiya: 300–400 AZN (175–235 dollar), şəhid ailələri üçün Prezident təqaüdü 500 AZN-dir (295 dollar):
“Azərbaycanda əsas birdəfəlik mexanizm sığorta ödənişidir: Şəhid ailəsinə 11 000 AZN (≈ 6470 dollar), əlil qazilərə isə 4400–8800 AZN (2600–5200 dollar) verilir”.
Onun sözlərinə görə, Ermənistanda ödənişlər daha yüksəkdir, belə ki, əlil olmuş veteranlara və həlak olanların ailələrinə 100 000 – 300 000 dram (260 – 770 dollar) verilir:
“Bu məbləğlərin 20 il müddətinə ödənilməsi nəzərdə tutulur. İtkin düşmüş hərbçilərin ailələrinə isə ayda təxminən 300 000 AMD (770 dollar) müvəqqəti aylıq dəstək verilir.
Ermənistanın birdəfəlik ödənişləri xüsusilə diqqət çəkir: Həlak olmuş və ya ağır əlil olan əsgərin ailəsinə 10 000 000 AMD (təxminən 25700 dollar) ödənilir. Yüngül xəsarət alanlara isə 5 000 000 AMD (12800 dollar) verilib”.
E.Həsənli burada xüsusi məqamı da vurğulayıb. O qeyd edib ki, Azərbaycan 44 günlük müharibəyə görə 106 min adama (80 min nəfər qazi, 26 min nəfər şəhid ailəsi, əlil qazilər və s.) pul ödəyir və ildə bu xərcləri ödəmək üçün dövlət büdcəsindən 107 milyon dollar ayrılır:
“Ermənistan isə cəmi 5 000 nəfərə – əlil veteranlar+həyatını itirmiş əsgərlərin ailələri (birbaşa aylıq pensiya alanlar) pul ödəyir. Ermənistanda sıravi, sağlam müharibə iştirakçıları faktiki olaraq yardımdan kənarda saxlanılıb. Orada bu işə Azərbaycandan az qala 4 dəfə az - hər il 30 milyon dollar ayrılır”.
E.Həsənli fikrincə, ilk gündən daha yığcam dairə müəyyən etməklə, daha yüksək ödəniş etmək doğru olardı.