2026-cı ilin son Günəş tutulması baş verdi: Səma bir neçə dəqiqəliyə qaraldı

12 avqust 2026-cı ildə ilin ikinci və son Günəş tutulması baş verib. Bu dəfə astronomiya həvəskarları nadir tam Günəş tutulmasının şahidi olublar. NASA-nın məlumatına görə, Ay Günəşlə Yer arasından keçərək Günəşin diskini tamamilə örtüb.

Tutulma haralarda göründü?

Tam tutulmanın zolağı Qrenlandiya, İslandiya, Şimali Rusiya, Şimali Atlantik okeanı, İspaniya və Portuqaliyanın kiçik bir hissəsindən keçib. Avropanın böyük hissəsində, Şimali Amerikanın bəzi bölgələrində və Afrikanın şimal-qərbində isə hadisənin qismən fazasını izləmək mümkün olub.
Tam tutulma zamanı Ay Günəşin parlaq səthini tam örtdüyü üçün səma qısa müddətə qaralıb və Günəşin xarici atmosferi – korona müşahidə oluna bilib. NASA-nın məlumatına görə, tam tutulma zolağının mərkəzi hissələrində bu mərhələ iki dəqiqədən bir qədər az davam edib.

Azərbaycanda müşahidə olunmadı

Tutulma Azərbaycan ərazisindən müşahidə edilməyib. Yerli astronomiya məlumatlarına görə, hadisənin Bakı vaxtı ilə ümumi müddəti təxminən 4 saat 24 dəqiqə olub. Maksimum faza saat 21:46-da qeydə alınıb.
Maraqlıdır ki, Günəş tutulması ilə bağlı sosial şəbəkələrdə yayılan “Yerin cazibə qüvvəsi bir neçə saniyəlik yox olacaq” iddiaları da elmi əsaslı deyil. Günəş tutulması Yerin cazibə qüvvəsini aradan qaldırmır.
Astronomların diqqətini çəkən başqa məqam isə Günəş tacının görünüşü olub. Günəşin maqnit sahəsi daim dəyişdiyi üçün hər tam tutulma alimlərə Günəşin xarici atmosferini fərqli formada müşahidə etmək imkanı verir.
Qeyd: Günəş tutulmasına adi gün eynəyi ilə baxmaq təhlükəlidir. Qismən tutulmanı müşahidə etmək üçün xüsusi sertifikatlı Günəş müşahidə eynəklərindən istifadə etmək lazımdır.