HƏYƏCAN TƏBİLİ: Doğulanların sayı kəskin azaldı, ölənlər isə...

Azərbaycanın demoqrafik vəziyyətində son illər müşahidə olunan neqativ meyillər dərinləşməkdə davam edir və rəsmi rəqəmlər ölkəni gözləyən təhlükənin ecazkar miqyasını açıq şəkildə ortaya qoyur.

Dövlət Statistika Komitəsinin yaydığı məlumata görə, cari ilin yanvar-iyun aylarında Ədliyyə Nazirliyinin rayon (şəhər) qeydiyyat şöbələri tərəfindən cəmi 40 798 doğulan körpə qeydə alınıb ki, bu da ötən ilin müvafiq dövrü ilə müqayisədə təqribən 4 818 körpə az deməkdir.

Statistikaya əsasən, doğulan körpələrin 53,5 faizini oğlanlar, 46,5 faizini isə qızlar təşkil edib. Doğuş sayının sürətlə aşağı düşməsi fonunda ölüm hallarında isə artım qeydə alınıb. Belə ki, ilin ilk altı ayı ərzində ölkədə 30 625 ölüm halı baş verib ki, bu da ötən ilin eyni dövrü ilə müqayisədə 1 225 nəfər çoxdur. Doğum səviyyəsinin kəskin enməsi və ölüm hallarının çoxalması ölkənin gələcək əmək ehtiyatları, əhalinin qocalması prosesi və ümumi milli təhlükəsizlik baxımından ciddi demoqrafik təhlükələr və ağır nəticələr vəd edir.

DuzXeber.az xəbər verir ki, məsələ ilə bağlı nocomment.az-ına geniş açıqlama verən tanınmış sosioloq Cabir Tağıyev bildirib ki, cari ilin birinci yarısında qeydə alınan bu statistika sadəcə rəqəmlər dəyişikliyi deyil, bütövlükdə Azərbaycan cəmiyyətinin strukturunda baş verən dərin sosial-iqtisadi böhranın və dəyərlər transformasiyasının bariz göstəricisidir: "Əhalinin təbii artım sürətinin zəifləməsi və doğuş sayının əhəmiyyətli dərəcədə azalması gələcəkdə ölkənin əmək bazarına, pensiya fonduna və sosial təminat sisteminə dağıdıcı zərbə vuracaq əsas amillərdəndir."

Onun sözlərinə görə, gənc nəsillərin ailə qurmaqdan çəkinməsi, sosial-iqtisadi çətinliklər, mənzil problemi, bahalaşma və müasir həyat tərzinin gətirdiyi fərdiyyətçilik meylləri demoqrafik tarazlığı pozan başlıca səbəblər sırasındadır: "Əgər bu tendensiya davam edərsə, yaxın gələcəkdə cəmiyyətimizin sürətlə qocalması, hərbi-müdafiə qabiliyyətinə təsir edəcək insan kapitalının azalması və regionlar üzrə demoqrafik boşluqların yaranması qaçılmaz olacaq."

Sosioloq xüsusi olaraq vurğulayıb ki, ölüm hallarının artması və doğumun azalması dövlət səviyyəsində təcili və kompleks stimullaşdırıcı tədbirlərin görülməsini tələb edir: "Ailə institutunun qorunması, çoxuşaqlı ailələrə dövlət dəstəyinin gücləndirilməsi, gənc ailələrin mənzil şəraitinin yaxşılaşdırılması və sosial təminatların artırılması istiqamətində radikal islahatlar həyata keçirilməlidir, əks halda yaxın onilliklərdə Azərbaycan ciddi demoqrafik böhranla üz-üzə qalacaq."/Tunar/