Binəqədidə rüşvət iddiası, qanunsuz tikililər və susdurulan səs

DuzXeber.az xəbər verir ki, Binəqədi Rayon İcra Hakimiyyətinin başçısı Elxan Allahverdiyev ətrafında son günlər səsləndirilən iddialar artıq sadəcə bir məmurun fəaliyyəti ilə bağlı tənqidi müzakirə çərçivəsindən çıxaraq ciddi ictimai maraq doğuran məsələyə çevrilib.
Əsas diqqət isə iki istiqamətə yönəlir: Elxan Allahverdiyevin vəzifə təyinatı müqabilində 200 min manat rüşvət alması barədə yayılan iddia və onun rəhbərlik etdiyi Binəqədi rayonunda çoxsaylı qanunsuz tikintilərin aparılması ilə bağlı uzun müddətdir səsləndirilən məlumatlar.
Təbii ki, 200 min manatlıq rüşvət iddiası təsdiqlənməyib və bunu fakt kimi təqdim etmək doğru olmaz. Lakin belə ağır ittihamın ictimaiyyətə açıq şəkildə çıxarılması, xüsusilə də dövlət vəzifəsi ilə əlaqələndirilməsi hüquqi qiymətləndirmə tələb edir.

Eyni zamanda Binəqədidə qanunsuz tikintilərlə bağlı səslənən çoxsaylı məlumatlar da təsadüfi məsələ kimi qiymətləndirilə bilməz. Rayon rəhbərliyinin ərazidə baş verən tikinti proseslərindən nə dərəcədə xəbərdar olduğu və qanunsuzluqların qarşısının alınması istiqamətində hansı tədbirlərin görüldüyü də ictimai nəzarətin predmetidir.
Amma məsələnin daha düşündürücü tərəfi ötən gün baş verən hadisədir.
Manset.az-ın baş redaktoru tərəfindən DuzXeber.az-ın baş redaktoru Kamal Əsgərova telefonla müraciət edilərək, Binəqədi Rayon İcra Hakimiyyətinin başçısı Elxan Allahverdiyevlə telefon danışığının səs yazısından hazırlanmış və DuzXeber.az-ın TikTok səhifəsində yayımlanan videoçarxın silinməsi xahiş olunub.
Maraqlıdır ki, həmin video cəmi bir saat ərzində 120 mindən artıq baxış toplamış, baxış sayı isə artmaqda davam edirdi.
Belə geniş ictimai maraq doğuran materialın müəllifinin qəfil şəkildə onun yayımının dayandırılmasını istəməsi isə təbii olaraq diqqət çəkir.
Telefon danışığı zamanı müəllifin ifadə və davranışından yaranan təəssürat belə idi ki, onun üzərində müəyyən basqı və ya başqa maraqlardan doğan narahatlıq mövcud ola bilər. Əlbəttə, bunun konkret səbəbini yalnız həmin şəxsin özü açıqlaya bilər.
Lakin burada mühüm bir prinsip var: əgər yayılan səs yazısında həqiqətə uyğun olmayan məlumat varsa, bunun hüquqi və jurnalist yolu materialı sildirmək deyil, onu təkzib etməkdir.
Xüsusilə də söhbət dövlət qurumunun rəhbəri ilə jurnalist arasında baş verdiyi bildirilən danışıqdan gedirsə, məsələyə açıq münasibət bildirilməsi daha doğru və sağlam mövqedir.
Çünki ictimai maraq doğuran materialı aradan qaldırmaq onun yaratdığı sualları aradan qaldırmır.
Əksinə, bəzən səsin kəsilməsi sualları daha da ucaldır.
Bu gün Binəqədidə söhbət yalnız bir icra başçısından və ya bir videoçarxdan getmir. Söhbət dövlət vəzifəsi ətrafında səsləndirilən ağır rüşvət iddiasından, rayonda qanunsuz tikintilərlə bağlı narazılıqlardan və medianın yaydığı materiala münasibətdən gedir.
Bu məsələlərə ən düzgün cavab susmaq və ya materialların yayımını dayandırmağa çalışmaq deyil.
Əgər iddia yalandırsa — təkzib edilməlidir.
Əgər məlumat yanlışdırsa — faktlarla cavab verilməlidir.
Əgər qanun pozuntusu varsa — araşdırılmalıdır.
Çünki dövlət idarəçiliyində şəffaflıq təkcə hesabat vermək deyil, həm də ictimai tənqid qarşısında açıq dayanmaqdır.
DuzXeber.az olaraq məsələni diqqətdə saxlayırıq.