Kamal Əsgərov: Dünya Azərbaycanlılarının Həmrəylik Günü və Yeni İl – Milli Birlik və İnkişafa Doğru

Dünya Azərbaycanlılarının Həmrəylik Günü və Yeni il münasibətilə bu əlamətdar günlər ölkəmiz və xalqımız üçün sadəcə təqvim bayramı deyil, həm də milli birliyin, dövlətçilik iradəsinin və tarixi ədalətin bərpasının rəmzidir.
Bu müqəddəs günlərdə Vətən uğrunda canlarını fəda etmiş şəhidlərimizi dərin ehtiramla yad edir, ruhlarına Allahdan rəhmət diləyirik. Onların qanı ilə yazılan şanlı tarix bu gün müstəqil və qalib Azərbaycanın möhkəm təməlidir. Qazilərimizə, müharibə veteranlarına və rəşadətli Azərbaycan Ordusuna cansağlığı, güc və qüvvət arzulayırıq. Məhz ordumuzun qəhrəmanlığı və xalq–ordu birliyi sayəsində dövlətimizin suverenliyi tam təmin olunub.
Bu gün Qarabağ və Şərqi Zəngəzur iqtisadi zonalarında müşahidə olunan sürətli inkişaf, genişmiqyaslı quruculuq və abadlıq işləri dövlətin strateji baxışının real nəticəsidir. Uzun illər məcburi köçkün həyatı yaşamış soydaşlarımızın artıq öz doğma yurd-yuvalarında Yeni ili və bayramları qarşılaması təkcə sosial hadisə deyil, həm də siyasi və mənəvi qələbənin təzahürüdür. Bu proseslər bölgənin iqtisadi potensialının bərpası ilə yanaşı, regional sabitliyə və uzunmüddətli inkişaf perspektivlərinə xidmət edir.
Bütün bu nailiyyətlər ölkə başçısı, cənab İlham Əliyevin uzaqgörən, prinsipial və ardıcıl siyasətinin nəticəsidir. Güclü dövlət, güclü ordu və milli birlik konsepsiyası bu gün öz bəhrəsini verməkdədir. Qarabağda yanan işıqlar, qayıdan həyat və bərpa olunan yurdlar Azərbaycanın gələcəyə inamla addımladığını göstərir.
Dünya Azərbaycanlılarının Həmrəylik Günü və Yeni il münasibətilə xalqımıza sülh, rifah və davamlı inkişaf arzulayır, milli birliyimizin daim möhkəm olmasını diləyirik.

Kamal Əsgərov
Jurnalist - "DogruXeber.tv" informasiya portalının rəhbəri