Mədəniyyət evi, yoxsa kağız üzərində fəaliyyət? – İmişli görüntülərinin dedikləri

Duzxeber.az:  "DogruXeber.tv" xəbər verir ki, sosial şəbəkələrdə yayımlanan bir video cəmiyyət arasında geniş müzakirələrə səbəb olub. Sözügedən görüntülərdə Mədəniyyət Nazirliyinin tabeliyində fəaliyyət göstərən Mil-Muğan Regional Mədəniyyət İdarəsinə bağlı İmişli rayon Diyarşünaslıq Evinin mövcud vəziyyəti əks olunub. Videoya diqqətlə baxıldıqda ortaya çıxan mənzərə təkcə bir mədəniyyət müəssisəsinin durumu ilə bağlı deyil, ümumilikdə Mədəniyyət Nazirliyinin fəaliyyəti ilə bağlı ciddi suallar yaradır.

VİDEO: TikTok
Telegram

Görüntülərdən aydın görünür ki, sözügedən müəssisə sovet dövründən qalma, uzun illərdir əsaslı təmir və bərpadan kənarda qalmış, maddi-texniki bazası köhnəlmiş bir binada fəaliyyət göstərir. Divarların, döşəmələrin aşınmış vəziyyəti, həyət hissəsindəki beton örtüyün dağılmış durumu, eləcə də interyerdə hələ də sovet dövrünə aid avadanlıqlardan istifadə olunması bu mədəniyyət ocağının uzun müddətdir sistemli dövlət qayğısından kənarda qaldığını göstərir.

Videoda diqqət çəkən məqamlardan biri də pəncərələrdə jalüz əvəzinə adi pərdədən istifadə olunması, eləcə də müəssisə rəhbəri kimi təqdim edilən Elşən müəllimin qış geyimində oturmasıdır. Bu detallar müəssisədə istilik sisteminin mövcud olmaması və ya normal işləməməsi ehtimalını gücləndirir. Bu isə mədəniyyət müəssisəsi statusu daşıyan bir dövlət obyektində minimal iş şəraitinin belə təmin olunmadığını göstərir.

"DogruXeber.tv" onu da qeyd edir ki, paylaşılmış videonun şərh bölümündə yer alan şərhlərdə müəssisənin bəzi hissələrinin rəhbərlik tərəfindən şəxsi vəsait hesabına bərpa edildiyi bildirilib. Bu fakt isə problemin fərdi idarəçilərdən yox, Mədəniyyət Nazirliyinin institusional səviyyədə üzərinə düşən vəzifələri yerinə yetirməməsindən qaynaqlandığını göstərir. Dövlətə məxsus bir obyektin saxlanılması şəxsi təşəbbüslərlə kompensasiya edilə bilməz.

Daha narahatedici məqam videoda səsləndirilən “bu, hələ yaxşı vəziyyətdə olanlardandır” ifadəsidir. Bu yanaşma dolayı yolla onu göstərir ki, ölkənin digər bölgələrində fəaliyyət göstərən mədəniyyət evləri və klubların vəziyyəti bundan da acınacaqlı ola bilər. Bu isə problemin lokal yox, sistem xarakterli olduğunu ortaya qoyur.



Məsələnin tarixi kontekstinə baxdıqda görünür ki, Mədəniyyət Nazirliyində illərdir ciddi institusional islahatlar aparılmayıb. Sabiq nazir Əbülfəz Qarayevin dövründən bu günə qədər bu sahədə əsaslı dönüş müşahidə olunmur. Əksinə, müxtəlif illərdə nazirlikdə hüquq-mühafizə orqanları tərəfindən keçirilən əməliyyatlar zamanı aşkarlanan korrupsiya və yeyinti faktları cəmiyyətdə bu quruma qarşı ciddi etimadsızlıq formalaşdırıb.
Hazırkı mədəniyyət naziri Adil Kərimlinin fəaliyyəti də hələlik bölgələrdə real dəyişikliklərlə müşayiət olunmur. Bu gün mədəniyyət müəssisələrinin əksəriyyətinin köhnə, baxımsız və funksiyasını itirmiş vəziyyətdə qalması idarəetmədə əvvəlki yanaşmaların davam etdiyini göstərir.

Xüsusilə qeyd olunmalıdır ki, bir çox rayonlarda “mədəniyyət evi” və “klub” adı altında fəaliyyət göstərən müəssisələr ya tamamilə fəaliyyətsizdir, ya da yalnız sənədlər üzərində mövcuddur. Qapıları illərlə açılmayan bu obyektlərdə işçi ştatları saxlanılır, dövlət büdcəsindən vəsait ayrılır. Bu isə faktiki olaraq dövlət büdcəsinin səmərəsiz xərclənməsi, yəni israf deməkdir.

Əgər bir müəssisə real fəaliyyət göstərmirsə, onun saxlanılmasının məqsədi nədir? Əgər fəaliyyət mövcuddursa, niyə bu fəaliyyət hələ də sovet dövründən qalma avadanlıq və uçuq-sökük binalar fonunda təqdim olunur? Halbuki “mədəniyyət” anlayışı estetik, keyfiyyət və inkişaf deməkdir.
"DogruXeber.tv" hesab edir ki, bu cür baxımsız və funksional imkanlarını itirmiş binaların hələ də mədəniyyət müəssisəsi adı altında saxlanılması Mədəniyyət Nazirliyi üçün ciddi reputasiya problemidir. Bu vəziyyət təkcə görüntü məsələsi deyil, eyni zamanda idarəetmə və məsuliyyət böhranının açıq göstəricisidir.

Nəticə etibarilə, sosial şəbəkələrdə yayımlanan bu video tək bir obyektin vəziyyətini deyil, illərdir yığılıb qalan sistem problemlərini əks etdirir. Problemin həlli şəxslərin deyil, institusional yanaşmanın dəyişdirilməsindən keçir.
"DogruXeber.tv" mövzunu diqqətdə saxlayacaq.