Android istifadəçiləri təhlükədə: Yeni casus proqram telefonları ələ keçirir

26-dan çox ölkədə Android istifadəçiləri yeni casus proqramın hücumuna məruz qalıb.
DuzXeber.az xəbər verir ki, bu barədə “RBC” Positive Technologies (PT) şirkətinin təhlükəsizlik üzrə ekspert mərkəzinə istinadən məlumat yayıb.
Bildirilib ki, “DragonDoll” adlı casus proqram istifadəçinin cihazına demək olar ki, tam nəzarət imkanı yaradır. Zərərli proqram smartfonda saxlanılan məlumatları, o cümlədən messencerlərdəki yazışmaları oğurlaya bilir.
Mütəxəssislər “DragonDoll”u ilk dəfə Səudiyyə Ərəbistanındakı istifadəçilərə qarşı həyata keçirilən hücumun araşdırılması zamanı aşkarlayıblar.
Hücum zamanı Android əməliyyat sistemində “Google Chrome” brauzerindən istifadə edən şəxs brauzerin rəsmi səhifəsinə bənzədilmiş saxta sayta yönləndirilir. Daha sonra istifadəçiyə brauzeri yeniləmək təklif olunur.
Lakin “yenilə” düyməsinə basıldıqda smartfona zərərli proqram yüklənir və casus modul quraşdırılır.
Bununla da kibercinayətkarlar cihazda baş verənləri izləyə, məlumatları ələ keçirə və smartfonu uzaqdan idarə edə bilirlər.
Mütəxəssislər istifadəçilərə brauzer və digər tətbiqləri yalnız rəsmi mənbələrdən yeniləməyi tövsiyə edirlər./Adəm/