XXI əsrin Yezidi peyda olub – suyun üzərində qurulan kadr siyasəti

Tanınmış jurnalist Kamal Əsgərov ölkədəki su problemi ilə bağlı öz facebook profilində maraqlı paylaşım edib. 
Facebook paylaşımını sizə olduğu kimi təqdim edirik...
DuzXeber.az: Ölkədə su ilə bağlı yaranmış vəziyyət artıq ayrı-ayrı rayonların deyil, ümumrespublika probleminə çevrilir. Xüsusilə əkin sahələrinin suvarılması, tərəvəz və digər kənd təsərrüfatı məhsullarının yetişdirilməsi üçün suya çıxışın çətinləşməsi ciddi narahatlıq doğurur. Bununla yanaşı, bir sıra rayonlarda içməli suyun verilməsində fasilələr yaranması, bəzi ərazilərdə su xətlərinin olmaması və mövcud xətlərin yararsız vəziyyətə düşməsi problemin miqyasını daha da böyüdür.


Təbii ki, ölkənin su siyasətinə və su təsərrüfatının idarə olunmasına görə məsuliyyət daşıyan əsas qurumlardan biri Azərbaycan Dövlət Su Ehtiyatları Agentliyidir. Agentliyə rəhbərlik edən Zaur Mikayılovun və onun tabeliyində fəaliyyət göstərən qurumların qarşısında bu problemlərin həlli ilə bağlı ciddi suallar yaranır.


Xüsusilə İri Şəhərlərin Birləşmiş Su Təchizatı Xidmətinin rəhbərliyində təcrübə və peşəkarlıq məsələsi də ictimai müzakirə mövzusudur. Qurumun rəhbəri Tahir Xəlilovun əvvəllər ticarət sektorunda çalışdığı və Zaur Mikayılovla eyni şirkət strukturunda fəaliyyət göstərdiyi barədə müxtəlif iddialar səslənir. Bu iddiaların özü belə aidiyyəti qurumlar tərəfindən aydınlaşdırılmalıdır.


Eyni zamanda, Tahir Xəlilovun qohumluq əlaqələrinin olduğu iddia edilən şəxslərin su təsərrüfatı sistemində müxtəlif vəzifələrə gətirilməsi ilə bağlı da ictimaiyyətdə suallar var. Məsələn, Yasamal Rayon Sukanal İdarəsində qısa müddət nəzarətçi işlədiyi iddia olunan bir şəxsin sonradan Gəncə şəhərində su təsərrüfatı strukturunda rəhbər müavini vəzifəsinə təyin edilməsi kimi hallar peşəkarlıq və kadr seçimi baxımından izah tələb edir.


Burada əsas məsələ kiminsə gənc olması deyil. Əsas məsələ strateji əhəmiyyət daşıyan su təsərrüfatı kimi bir sahənin idarə olunmasında təcrübə, peşəkarlıq, məsuliyyət və nəticənin olub-olmamasıdır. Çünki yanlış kadr siyasətinin nəticəsini ilk növbədə vətəndaş, fermer və kənd təsərrüfatı istehsalçısı yaşayır.


Təqdim etdiyimiz video görüntülərdən də aydın görünür ki, İmişli rayonunun Bəciravan kəndində yaşanan su problemi heç də yalnız bir kəndə və ya bir rayona xas məsələ təsiri bağışlamır. Oxşar vəziyyətin ölkənin müxtəlif rayonlarında müşahidə olunması su təsərrüfatında sistemli problemlərin araşdırılmasını zəruri edir.


Artıq vətəndaşın haqlı sualı budur: su kimi həyati əhəmiyyətli strateji resursun idarə olunmasında mövcud problemlər nə vaxt və necə həll ediləcək?


Səsləndirilən bütün iddialar, əlbəttə, aidiyyəti qurumların mövqeyi və rəsmi açıqlamaları əsasında dəqiqləşdirilməlidir. Lakin ortada real problem varsa, onu görməzdən gəlmək yox, səbəblərini araşdırmaq və məsuliyyət daşıyan şəxslərdən cavab tələb etmək lazımdır.
Kamal Əsgərov 
​https://www.facebook.com/share/r/14o2XejksdB/​​​