Azərbaycanla sülh Ermənistanın Rusiya ilə münasibətlərini dəyişir - Paşinyan

Ermənistan və Azərbaycan arasında sülhün əldə olunması, eləcə də Ermənistan-Türkiyə istiqamətində gərginliyin azalması İrəvanla Moskva arasındakı münasibətlərin dəyişməsini qaçılmaz edir.
DuzXeber.az xəbər verir ki, bunu Ermənistanın baş naziri Nikol Paşinyan parlamentdə hökumətin 2026-2031-ci illər üzrə proqramını təqdim edərkən deyib.
Paşinyanın sözlərinə görə, Ermənistan-Rusiya münasibətlərindəki transformasiya kiminsə siyasi qərarı və ya kaprizi ilə bağlı deyil, Cənubi Qafqazda yaranan yeni vəziyyətin təbii nəticəsidir.
Baş nazir bildirib ki, Azərbaycanla münaqişə şəraitində formalaşan münasibətlər sülhə keçiddən sonra əvvəlki kimi qala bilməz. Ermənistanın Türkiyə ilə əlaqələrin normallaşdırılmasında müsbət perspektivlər görməsi də bu prosesə təsir edən amillərdəndir.
Paşinyan qeyd edib ki, son iki əsr ərzində Ermənistan-Rusiya əməkdaşlığı əsasən müdafiə və təhlükəsizlik məsələləri üzərində qurulub. Lakin 2021-2023-cü illərdə Azərbaycan-Ermənistan istiqamətində baş verən hadisələr, onun fikrincə, Moskvanın bu rolu yerinə yetirmək imkanlarının müəyyən məhdudiyyətlərə malik olduğunu göstərib.
Bununla belə, Ermənistan hökuməti Rusiya ilə dialoqu davam etdirmək niyyətindədir. İrəvan yeni regional reallıqları nəzərə alaraq Moskva ilə münasibətləri yenidən qurmağı və balanslaşdırılmış xarici siyasət kursunu davam etdirməyi planlaşdırır.