“Heç bir turist o əldən qutab alıb yeməz” – Bölgə turizmini TƏNQİD ETDİ

“Turizmlə bağlı çoxsaylı təşkilatlar olsa da, bu sahədə boşluqlar mövcuddur. Niyə bu işləri indiyə qədər doğru-düzgün təşkil edə bilmirik? Bu sual bizi düşündürməlidir”.
DuzXeber.az xəbər verir ki, iqtisad-elmləri doktoru professor Zahid Məmmədov bunu Bakıvaxtı.az-a danışarkən bildirib.
“Turizmlə bağlı çeşidli birliklər fəaliyyət göstərir. Neçə ildir turizmin inkişafından danışılır, amma gəlin, görək ÜDM-də, məşğulluqda turizmi artıra bildikmi? Bu suallara cavab verilməlidir. Buna dair institutlar açıldı. Rayonlara səfərlər edildi. İndi hamı kənd turizmindən bəhs edir. Kənd turizmi ilə şəxsən maraqlanıram, gedirəm, baş çəkirəm. Axı o cür pasteldə insan yatmaz. Axı elə antisanitar şəraitdə turist qəbul etmək olmaz. Onu yoxlamaq lazımdır. Adını kənd turizmi qoyublar, o hotellərə daxil olmaq olmur. Mən gedib baxdım. Natəmiz yerlədir, qab-qacaqlar, otaqlar natəmizdir. Axı xaricdən gələn insan bunu görəndə nə düşünər? Xidmət səviyyələri çox aşağıdır. Burada düzgün qiymətləndirmə olmalıdır. Ən vacib şərtlərdən biri budur”.
Professor hesab edir ki, ölkəmizdə turizm idman və mədəniyyətlə eyni sistemdə olmalıdır:
“Biz bunu bir-birindən ayırmamalıyıq. Bunlar bir-birindən asılıdırlar. Turizm mədəniyyətin tərkib hissəsidir. Turizm sahəsi Mədəniyyət Nazirliyinin tərkibinə qaytarılmalıdır. Bu sahə bizə gəlir gətirməlidir. Tədqiqatlar aparılmalıdır. Onun iqtisadi artımda payı hesablanmalıdır. Səbəb və nəticələr araşdırılmalıdır”.
Z.Məmmədov hesab edir ki, rayon icra hakimiyyətləri bu işdə məsuliyyət daşımalıdırlar:
“Sən turizm bölgəsinin başçısısan hanı gəlirin? Dəhşət burasındadır ki, turizm bölgəsinin icra başçısı büdəcədən dotasiya istəyir. Bu, necə ola bilər? İtaliyanın ən geridə qalmış bölgələri balaca yerlərdən milyonlar qazanırlar. Türkiyə qəsəbə turizmi elə inkişaf edib ki…Bizm bələdiyyə və icra hakimiyyətlərinə sual olunmalıdır ki, bu illər ərzində nələr etmisiniz? Bu dövlətə nə vermisiniz? Təzə dəb çıxıb, icra başçıları gedib, toylarda rəqs edib, onu sosial şəbəkələrdə paylaşdırırlar. Bitdi o dövr, bitdi! Buna ehtiyac yoxdur. Sən mənə rəqsini deyil, insanların məşğulluq səviyyəsini göstər! İnvestiysiya cəlb edə bilmisənmi?”.
 Azərbaycandakı bulaq sularına diqqət çəkən müsahibimiz vurğulayıb ki, bəzi ölkələr müalicəvi bulaq sularından milyonlar qazanır:
“Bir bulaqdan nə qədər gəlir götürürlər. Turistlər o mənbədən su içmək böyük vəsait ödəyir. Ölkəmizdəki bu cür bulaqların ətrafı təmizdirmi? Nə qurdunuz, nə yaratdınız? Təəccüb edirəm. Niyə onların ətrafı natəmiz olmalıdır? O yolların kənarlarında qutab bişirənlərə səliqəli paltar geyindirin! Adam əlinə elə bir əlçək geyinir ki, heç bir turist onun əlindən heç nə alıb yeməz. Bunu məndən başqa görən yoxdurmu?! Bu iş gözəl olmalıdır. Türkiyəyə baxın. “Mola” sistemi qursanız, görün rayonlarda turizm obyektləri nə qədər inkişaf edəcək? Nolar ölkəmizi gözəl edin!. Qiymətləri artırmayın. Kəndə gedirsən, kənd toyuğu, kənd yumurtası və kənd südü tapmırsan. Bəs necə fəaliyyət göstərəcəksiniz?!”.(Tribuna.az)