Azərbaycan Respublikası Qida Təhlükəsizliyi Agentliyinin (AQTA) həyata keçirdiyi nəzarət tədbirləri çərçivəsində qanunsuz olaraq satışa çıxarılan “Tea By Gunay” və “Metobix çayı” adlı “arıqlama çayı” məhsulları aşkarlanıb. Agentlikdən bildirilib ki, baxış zamanı həmin məhsulların qanunvericiliyin tələblərinə uyğun etiketlənmədiyi müəyyən edilib.

Məhsulların üzərində yararlılıq müddəti, istehsalçının ünvanı, tərkibi və digər zəruri məlumatlar qeyd olunmayıb, həmçinin onların xəstəliklərin müalicəsində istifadə edildiyi barədə məlumatlar yerləşdirilib və heç bir müvafiq icazə sənədi olmadan satışı həyata keçirilib.

Araşdırma zamanı məlum olub ki, Günay Həsənova və Çiçək Mehtizadə sözügedən çayları müxtəlif apteklərdən əldə edərək təbii otlardan hazırlayıb, ev şəraitində qablaşdırıb və hər hansı icazə sənədi olmadan “Instagram” səhifələri vasitəsilə onlayn satıblar. Eyni zamanda, həmin şəxslərin sosial media hesablarında özlərini “həkim-diyetoloq” kimi təqdim etdikləri də müəyyənləşdirilib. Faktlarla bağlı inzibati protokol tərtib edilib, məhsullardan nümunələr götürülərək laborator müayinələrə cəlb olunub, həmçinin qanunsuz sahibkarlıq və tibbi fəaliyyətlə əlaqədar aidiyyəti dövlət orqanlarına rəsmi müraciətlər göndərilib. AQTA vətəndaşlara sosial şəbəkələrdən və onlayn platformalardan arıqlama məqsədilə satılan məhsulları alarkən diqqətli olmağı, etiket məlumatlarının tamlığına və satışın qanuniliyə uyğunluğuna diqqət yetirməyi tövsiyə edir.

Məsələ ilə bağlı DuzXeber.az-a açıqlama verən dietoloq Nazənin Məmmədli qeyd edib ki, sosial şəbəkələrdə tanınmayan şəxslər tərəfindən ev şəraitində hazırlanıb satılan arıqlama çaylarına inanmaq insan sağlamlığı üçün bir növ təhlükəli oyundur:

"Bu gün internetdə saxta 'həkim' adı altında fəaliyyət göstərən, heç bir tibbi təhsili olmayan şəxslərin hazırladığı çaylar tamamilə qanunsuzudur və insan orqanizminə birbaşa zərbə vurur. Vətəndaşlar bilməlidirlər ki, təbiətdə 'sehrli çay' adlı hər hansı arıqladıcı vasitə mövcud deyil. Həmin məhsulların çoxunun tərkibinə orqanizmi susuzlaşdıran və bağırsaq florasını məhv edən zərərli maddələr qatılır".

Onun sözlərinə görə, sağlam şəkildə çəki atmaq yalnız düzgün qidalanma rejimi, su balansı və fiziki aktivliklə mümkündür:

"Ev şəraitində qablaşdırılan, harada istehsal olunduğu naməlum olan məhsulları alan şəxslər öz sağlamlıqlarını təhlükəyə atırlar. Çay içməklə arıqlamaq xülyası sadəcə fırıldaqçıların vətəndaşları aldatmaq üsuludur. Hər kəsə tövsiyə edirəm ki, sosial şəbəkələrdən bu cür şübhəli vasitələri almasınlar, əks təqdirdə fəsadları çox ağır ola bilər".//Tunar (nocomment.az)

Paylaş