Asif Əsgərov o zaman CANINI QURTARA BİLDİ... - AMMA İNDİ...

Duzxeber.tv:  "Heç kimsə toxunulmaz deyil" cümləsi doğru deyil. Belə deyilməlidir: "Qanunu pozan heç kimsə toxunulmaz deyil".
Bir neçə gündən sonra yola salacağımız 2025-ci il "Konstitusiya və suverenlik ili" adlandırılmışdı. Bax, bu suveren Azərbaycanın Konstitusiyası ölkənin bütün vətəndaşlarının həm şəxsiyyətini, həm mülkiyyətini toxunulmaz elan edib. Yalnız qanunu pozanlar, daha doğrusu, cinayət törədənlər həbs oluna, cəmiyyətdən təcrid edilə bilər.

Son günlər mediada maraqlı fikir başlıqlarına rast gəlirik. Onlardan biri belədir: "Ölkədə heç kim qanundan üstün deyil". Yəni kim qanundan kənara çıxsa, "içəri" girəcək.

Maraqlı transformasiyanın izləyiciləriyik. "Hamı qarşısında bərabərdir" devizi ilə həbslər keçirilir. Xüsusilə, Prezidentin Mühafizə Xidmətinin keçmiş rəisi, general-polkovnik Bəylər Əyyubovun qardaşıoğullarından birinin işdən çıxarılması, o birinin həbs olunması fonunda bu mövzu gündəmə gəlib.

Noyabr ayında ölkə prezidenti İlham Əliyev yeni təyin etdiyi məmurları qəbul edərkən demişdi ki, heç kim vəzifədə olan tanışına, qohumuna, dostuna arxalanıb, qanunu pozmağa cəsarət eləməsin, əks halda özü də, onu himayə edənlər də cəzalanacaq.

Bunun ən bariz nümunələri Bəylər Əyyubovun qohumlarıdır. General Əyyubovun hazırda Prezident Katibliyinin rəisi vəzifəsində, yəni yenə də dövlət başçısın yanında olması onun qohumlarının cəzadan yayındırılmasına şərait yaratmayıb. Əminəm ki, heç Bəylər Əyyubovun özü də Prezidentə və ya hər hansı başqa vəzifəli şəxsə bu barədə heç nə deməyib, heç bir xahiş etməyib. Xüsusilə külli miqdarda qaçaqmalçılığa görə həbsə alınmış Ruslan Eyyubovun həbsi ilə apelyasiya şikayətinin geri çəkilməsi də, əminəm ki, Bəylər Əyyubovun öz qohumunu himayə etməməsi ilə bağlıdır. Artıq heç nə əvvəlki kimi deyil.

Şübhəsiz, yadınızdadlr: baş nazirin keçmiş müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənovun qohumu öz avtomobili ilə bir neçə nəfəri vurdu, onlardan bəziləri ölmüşdü. Qaçqınkomun sədri öz əzizini məsuliyyətdən qaçırmaq üçün əlindən gələn hər şeyi elədi. Yaxud Səbail rayon icra hakimiyyətinin başçısı Asif Əsgərovun yeniyetmə oğlu sürücülük vəsiqəsi olmadan avtomobil idarə edərkən, qəza törətdi, özü yaşda sərnişini həlak oldu, ancaq icra başçısının oğlu deyil, onun maşını arxasına çırpdığı yük maşınının sürücüsünü həbs elədilər. Asif Əsgərov isə oğlunu cəzadan yayındırmağı bacardı; başçının oğlu bir il "yatıb" çıxdı. Atasına da "gözün üstə qaşın var" deyən olmadı. Səbayeldən keçib Nəsimi rayonunda başçı oldu, hazırda isə deputatdır.

Belə misalları çox göstərmək olar. Elə Ramiz Mehdiyevin kimləri günahsız yerə türməyə atdırdığına, kimləri isə layiq olduğu cəzadan yayındırdığına dair nə qədər söz-söhbət var.

İndi bu cür hallara son qoyulur; atanın, ya da əminin, dayının, xalanın, bibinin... vəzifədə olması kimsəni məsuliyyətdən kənarda qoymayacaq deyirlər. Bir sözlə, heç kimə güzəşt edilməyəcək. Cinayət edən kim olursa-olsun, başını sığallayan, cəzadan yayındıran olmayacaq. Kim buna cəhd eləsə, özü də cəzalanacaq.

Əlbəttə, bu, əslində hardan baxsan, yaxşı gedişatdır. Yüksək vəzifəli dövlət məmurlarının harınlamış balaları artıq küçədə istədiyi adamın üstündən maşınla keçməyəcəksə, bunun özü böyük irəliləyişdir. Həm də qoy o məmurlar da görsünlər, indiyə qədər qara camaat nə çəkib...//bizimyol.info