Lahıcda həkimlərdən pul topladığı deyilən mərkəz müdiri DANIŞDI: - “Boş-boş danışmasınlar, ordan heç “spiçka” da götürmürəm, Allah cənab İlham Əliyevə cansağlığı versin”

Bu barədə Pravda.az-a daxil olan şikayətdə bildirilib ki, A.Abdullayeva dekabr ayından etibarən Mərkəzi Bakıdan video-görüntü ilə idarə edir.

“İsmayıllı Rayon Mərkəzi Xəstəxanasının baş həkiminin pulunu verir, sonra da bildiyini edir. Dekabr ayında 17 nəfər işçidən hərəsindən 30 manat alıb, baş həkimə verib. İndi isə özü Bakıdadır. Üç gün öncə yenə işçilərə zəng etdi ki, İsmayıllı Rayon Mərkəzi Xəstəxanasından İfadə xanm deyir ki, puldan mənə heç nə çatmayıb, 100 manat göndərin. Adilə xanım yenə hərəyə 6-7 manatdan yığıb 100 manat düzəldilməsini və İfadə xanıma verilməsini tapşırdı. Dedi ki, pulu kartla göndərməyin, özümə verin. İşçilər narazılıq etdiklərində isə Adilə Abdullayeva Mərkəzi bağlatdıracağı ilə bağlı onları hədələdi. Hər dəfə həkimlərə bu cür hədə-qorxu gəlir. Hətta 2-3 ay öncə stomatoloq Rövşən Əliyevi işindən bezdirdi, elə vəziyyət yaratdı ki, həkim işdən çıxdı. İndi Mərkəzdə stomatoloji kabinet bağlıdır. Avadanlıqlar isə yerində yoxdur. Belə məlumat var ki, İsmayıllı Rayon Mərkəzi Xəstəxanasına aparıblar. Qəsəbənin 1500 nəfərlik əhalisi var, kiminsə dişi ağrısa, hara getməlidir? Gərək biz maşın tutub İsmayıllıya gedək? Mərkəzin adı əvvəllər Ayaz Əliyev adına Lahıc Qəsəbə Xəstəxanası idi. Sonradan həmin adı götürdülər. Sözügedən stomatoloq Rövşən Əliyev Ayaz Əliyevin qardaşıdır. O, bu yaxınlarda Mərkəzə Ayaz Əliyev adını yenidən məhkəmə yolu ilə qaytardı. İllər öncə cənab Prezident İlham Əliyev bu xəstəxananı Lahıc camaatına hədiyyə edib”, - şikayətdə qeyd olunub.
Məsələni aydınlaşdırmaq üçün Pravda.az-ın əməkdaşı Adilə Abdullayeva ilə əlaqə saxlayıb. Mərkəz müdiri deyilənləri inkar edib: “Bunu kim deyir? Mən yanvarın 5-dən məzuniyyətdəyəm, amma məzuniyyətin çoxunu işimə gedirəm. Necə yəni görüntülü idarə edirəm? Mən yoxam deyə işçilər istədikləri vaxt işə gəlib-gedirlər. Nahar fasiləsinə 12:30-da gedib, 15:00-da gəlirlər. Mən də demişəm ki, hünəriniz var, belə şey edin, vəssalam! Mənim nə borcuma qalıb? Nə ixtiyarım var ki, Mərkəzdən nəsə götürəm? Ordan heç "spiçka" da götürmürəm. Məlumatı yazanda yazardılar ki, həkim heç kimdən pul götürmür, deyir ki, Allah cənab İlham Əliyevə cansağlığı versin, maaşımızı alırıq... Yaxşı, sən Allah, qurtarın, ay bacı, boş-boş sözlər danışmasınlar. Mən belə şeyləri sevmirəm, 70 yaşım var, uşaq deyiləm. Lazım olsa, işdən çıxaram, elələri ilə işləmərəm".
Qeyd: Mərkəzi Xəstəxananın baş həkimi Nərgiz Rəhimovadır.