Şöhrətmi, Şərəfmi? Biz Kimləri Qəhrəmanlaşdırırıq?

Duzxeber.az xəbər verir ki, jurnalist Kamal Əsgərov şəxsi Facebook hesabında yayımladığı paylaşımda cəmiyyətdə formalaşdırılan “uğur” anlayışına sərt münasibət bildirib. Əsgərovun paylaşdığı videoda iş adamı Şərurlu İsfəndiyarın gənc yaşlarında etdiyi oğurluq əməllərindən açıq şəkildə danışması diqqət çəkir. Jurnalist bu cür çıxışların utanılacaq keçmişin deyil, qürur mənbəyi kimi təqdim edilməsini mənəvi dəyərlərin aşınması kimi qiymətləndirərək, cəmiyyətin kimləri örnək seçməsi ilə bağlı ciddi suallar qoyur.

Tarix boyu insan cəmiyyətlərində maraqlı bir paradoks müşahidə olunub: bəzən insan öz keçmişini gizlətməyə çalışır, bəzən isə onu “uğur hekayəsi” adı altında fəxrlə nümayiş etdirir. Dünən özünü sadə bir çoban kimi təqdim edən, bu gün isə oğurluq və quldurluq kimi əməlləri açıq şəkildə dilə gətirərək bundan utanmaq əvəzinə qürur duyan insanlar, əslində öz mənəvi iflaslarını elan etdiklərinin fərqində belə olmurlar.

Fəlsəfə bizə öyrədir ki, insanın böyüklüyü malik olduqları ilə deyil, necə qazandığı ilə ölçülür. Qanunsuzluq üzərində qurulan sərvət, haram üzərində tikilən şöhrət zahirdə parlaq görünsə də, mahiyyət etibarilə çürükdür. Çünki həm ilahi ədalət, həm də dünyəvi qanunlar oğurluğu və zülmü açıq şəkildə rədd edir. Buna baxmayaraq, bəzi insanlar bu əməlləri “ağıllılıq”, “bacarıq”, hətta “qəhrəmanlıq” kimi təqdim etməyə çalışırlar. Bu isə ağlın deyil, vicdanın susmasının nəticəsidir.

Ən təhlükəli məqam isə ondadır ki, bu cür şəxslər təkcə özlərini deyil, cəmiyyəti də aldadırlar. Daha acınacaqlısı, dırnaqarası media bu insanları bəzək-düzəklə xalqa “uğurlu”, “nümunəvi” obraz kimi təqdim edir. Halbuki inkişaf etmiş, hüququn aliliyinə söykənən cəmiyyətlərdə önə çıxarılanlar oğurluqla varlananlar deyil, elm adamları, düşünən beyinlər, xalqa real fayda verən şəxsiyyətlərdir.

Cəmiyyət kimləri alqışlayırsa, gələcəyini də onların üzərində qurur. Əgər əxlaqsız keçmişi olan müğənnilər, haramla öyünən “iş adamları” və cəmiyyətə zərrə qədər xeyri olmayan şəxslər qəhrəmanlaşdırılırsa, bu artıq tək-tək fərdlərin problemi deyil — bu, ümumi dəyər böhranıdır.
Belə bir mühitdə gənclərə verilən mesaj təhlükəlidir: sanki dürüstlük yox, hiylə; zəhmət yox, talan uğurun açarıdır.

Burada belə bir sual yaranır:

Biz cəmiyyət olaraq kimləri örnək seçirik — vicdanı olanları, yoxsa var-dövləti olanları?

Əxlaqı, yoxsa görüntünü?

Dəyəri, yoxsa şişirdilmiş şöhrəti?

Bu suallara verilən cavab, əslində, bizim hansı gələcəyə layiq olduğumuzu da müəyyənləşdirir.

Video: https://www.facebook.com/share/v/17unB81dsi/

Kamal Əsgərov
Jurnalist - "DogruXeber.tv" informasiya portalının rəhbəri