Uşaqların sosial şəbəkələrə girişinə qadağa qoyulması təklif olunur

“Uşaqların tərbiyəsinə güclü təsir edən hazırda sistem sosial şəbəkələrdir. Bu, eyni zamanda uşaqların təhsilinə də təsir edir. Bununla bağlı bir sıra qadağalar və məhdudiyətlər olmalıdır".

Duzxeber.az xəbər verir ki, bunu Milli Məclisin Ailə, qadın və uşaq məsələləri komitəsinin bu gün keçirilən iclasında yeni hazırlanan “Uşaq hüquqları haqqında” qanun layihəsinin müzakirəsi zamanı elm və təhsil nazirinin müavini Firudin Qurbanov deyib.

"Bilmək istərdim ki, bu məsələyə Milli Məclisdə baxılırmı? Avstraliyada ilk dəfə 16 yaşdan aşağı şəxslərin sosial şəbəkədən istifadəsi ilə bağlı belə qadağa qoyulub. Buna İngiltərə və İspaniya da hazırlaşır", - deyə nazir müavini bildirib.

Ombudsman Səbinə Əliyeva nazir müavininon çox vacib bir məsələyə toxunduğunu qeye edib: "Mən də öz növbəmdə demək istərdim ki, unutmamalıyıq ki, süni intellekt insan hüquqlarına ən böyük təhdiddir. Bu məsələlərə ciddi yanaşmalıyıq. Xüsusilə də uşaqlar arasında pis vərdişlərin yayılması. Mənim tərəfimdən hazırlanmış hesabatda “Roblox” adlı oyunla bağlı məsələ öz əksini tapıb. İstərdim ki, bunun qarşısı ciddi şəkildə alınsın”.

Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, “Roblox”-a müraciət ünvanlanıb: “Komitə olaraq biz “Roblox” korporasiyasına rəsmi müraciət ünvanlamışıq. Bildiyiniz kimi, bu platforma geniş oyun şəbəkəsinə malikdir və uşaqlar üçün demək olar ki, heç bir ciddi giriş məhdudiyyəti mövcud deyil. Uşaqlar orada öz ideyalarını sərbəst şəkildə reallaşdıra, həmin məzmunu dərhal ictimailəşdirə və digər uşaqları da bu prosesə cəlb edə bilirlər. Bu isə ciddi və zərərli nəticələr doğura bilər.

Rəsmi müraciətimizdə iradlarımızı bildirmişik və onların nəzərə alınmasını tələb etmişik. Əgər bu məsələlər əməkdaşlıq çərçivəsində həll olunarsa, bu yolu seçəcəyik. Əks halda isə qanunvericilik təşəbbüsləri ilə çıxış edəcəyik. Hesab edirəm ki, təkcə uşaqların deyil, ümumilikdə vətəndaşların sosial şəbəkələrdə davranışı məsələsi də bizi ciddi addımlar atmağa vadar edir. Təəssüf ki, bəzən yalnız uşaqlar və gənclər deyil, yetkin yaşlı-başlı adamlar belə etik normaları və dəyərləri pozan davranışlar sərgiləyirlər”.