DSMF-nin başı təmir və avtomobil almağa qarışıb: 3.7 milyonluq tender

Duzxeber.az xəbər verir ki, qurumun bununla bağlı elan etdiyi tenderin nəticəsi açıqlanıb.

Məlum olub ki, Dövlət Sosial Müdafiə Fondunun Bakı şəhəri, Yasamal rayonu, Həsən bəy Zərdabi prospekti 80 ünvanında yerləşən inzibati binasının əsaslı təmiri işlərini “TVM İNŞAAT” MMC həyata keçirəcək. Şirkət bu təmir işlərinə görə, 3 milyon 769 min 403 manat ödəniş alacaq.

Qeyd edək ki, DSMF son bir ildə 11 tender keçirib. Məsələnin maraqlı tərəfi odur ki, dövlət qurumunun keçirdiyi tenderlərdən 4-ü xidməti avtomobillərin satın alınması və onlara texniki xidmətin göstərilməsi ilə bağlıdır. Məsələn, Fond ötən ilin oktyabrında 1 ədəd, noyabr ayında isə 4 ədəd xidməti minik avtomobilinin “YENİMOTOR” MMC-dən alarkən, 56 min 100 və 227 min 120 manat pul ödəyib.

Bunun ardından isə Fondun Aparatının və struktur bölmələrinin balansında olan xidməti avtomobillərə cari təmir xidmətinin satın alınması üçün “RN STRONG” MMC ilə 147 min 274 manatlıq müqavilə bağlayıb. Bu da yetməyib, DSMF nəqliyyat vasitələrinin əsaslı təmiri xidmətlərinin satın alınmasına dair “BEST AUTO SERVİCE” MMC ilə ilə anlaşıb. Buna görə də, şirkətə 140 min 672 manat ödəyib.

Görünən odur ki, DSMF-nin başı inzibati binasının təmiri, xidməti avtomobil alınması və onlara servis göstərilməsinə qarışıb.

Qarşı tərəfi də dinləməyə hazırıq.//Tribuna.az