Polşada şok hadisə: İstanbul reysini ildırım vurdu, təyyarə geri qaytarıldı

Polşada sərnişin təyyarəsinə ildırım düşüb. Təyyarə saat 13:00 radələrində Şopen hava limanından havaya qalxıb və Pruşkuv yaxınlığında ildırım zərbəsinə məruz qalıb.

Məlumata görə, LOT Polish Airlines aviaşirkətinə məxsus təyyarə Varşavadan İstanbula (LO103 reysi) uçuş həyata keçirirmiş. Hadisə havaya qalxdıqdan bir neçə dəqiqə sonra baş verib.

Duzxeber.az xəbər verir ki, “inPoland” nəşrinin yazdığına görə, təyyarə Qarvolin üzərində olarkən ildırım ona dəyib.

Şirkətin nümayəndəsi Kşiştof Moçulski bildirib ki, sərnişinlər zərbəni hiss etməyib. Buna baxmayaraq, pilotlar təhlükəsizlik məqsədilə təyyarəni geri qaytararaq yenidən Şopen hava limanına endiriblər.

Təyyarə texniki baxışdan keçirilmək üçün yoxlamaya göndərilib. Qeyd olunub ki, bütün zəruri tədbirlər yüksək təhlükəsizlik standartlarına uyğun şəkildə həyata keçiriləcək və təyyarə ən azı bir gün ərzində yenidən istismara qaytarıla bilər.

Sərnişinlər üçün alternativ təyyarə ayrılıb və onlar təxminən iki saat sonra Türkiyəyə uçuşlarını davam etdiriblər.

Xatırladaq ki, amerikalı Geri Reynoldz dörd dəfə ildırım vurması kimi nadir hadisə ilə üzləşib. O, bundan sonra ciddi fiziki və psixoloji dəyişikliklər hiss etdiyini bildirib.