Mikayıl Cabbarov Bakının yeni inkişaf modelindən danışdı

Azərbaycan mürəkkəb hərbi münaqişəni həll edib və regionda yeni sülh arxitekturasının formalaşdırılmasında fəal iştirak edir.
DuzXeber.az xəbər verir ki, bunu Bakıda keçirilən Ümumdünya Şəhərsalma Forumunun 13-cü Sessiyası çərçivəsində “Bağlantının mərkəzində şəhərlər: şəhərlərin yenidən qurulması və regional əməkdaşlıq” mövzusunda xüsusi sessiyada Azərbaycanın iqtisadiyyat naziri Mikayıl Cabbarov bildirib.
O qeyd edib ki, istənilən dövlət siyasətinin və şəhər inkişafının əsas göstəricisi insanların həyat keyfiyyətidir.
“Azərbaycanda Bakı və Sumqayıt inzibati baxımdan ayrı şəhərlər olsa da, iqtisadi və bağlantı baxımından vahid böyük iqtisadi zonanı təşkil edir. Bu ərazi ölkənin ÜDM, məşğulluq və investisiya baxımından əsas hissəsini formalaşdırır.
Bakıda həyata keçirilən layihələr – o cümlədən Ağ Şəhər konsepsiyası və digər yeni şəhərsalma təşəbbüsləri urbanistika və memarlıq baxımından yeni yanaşmanı nümayiş etdirir. Şəhərin inkişafında beynəlxalq investorların iştirakı da diqqət çəkir”.
Nazir həmçinin vurğulayıb ki, əhalisi 1 milyondan çox olan şəhərlərin iqtisadi rolu böyükdür və Bakı bu baxımdan regionun mühüm mərkəzlərindən biridir:
“Şəhərin inkişafı həyat keyfiyyəti, iş yerləri, nəqliyyat bağlantıları və dayanıqlı iqtisadi artım arasında balans yaratmağa yönəlib.
Qlobal iqtisadiyyatın rəqəmsal həllər, yüksək mobillik və yeni təhlükəsizlik yanaşmaları ilə dəyişdiyi bir dövrdə Bakı özünü regional iqtisadi və logistika mərkəzi kimi möhkəmləndirməyə çalışır”.
Onun sözlərinə görə, bu siyasətin əsas istiqamətlərindən biri yerli insan kapitalı ilə xarici investisiya və istedadların birləşdirilməsidir:
“Bunun üçün iqtisadi islahatlar, qanunvericilik dəyişiklikləri və beynəlxalq ticarətə uyğunlaşma tədbirləri həyata keçirilir.
Şəhər iqtisadiyyatında xidmət sektoru da mühüm rol oynayır. Beynəlxalq tədbirlər, sərgilər, forumlar, gündəlik şəhər həyatı və mədəni fəaliyyətlər Bakının iqtisadi mövqeyini gücləndirən amillərdir”.
M.Cabbarov onu da əlavə edib ki, işğaldan azad edilmiş ərazilərin yenidən qurulmasında əsas prinsiplərdən biri dayanıqlı inkişafdır:
“Bu prosesdə əvvəlki səhvlərdən nəticə çıxarılıb və iqtisadi fəaliyyətin düzgün ardıcıllıqla qurulmasına xüsusi diqqət yetirilir.
Əsas məqsədlərdən biri uzun illər evlərindən uzaq düşmüş insanların geri dönüşünü sürətləndirmək və həmin ərazilərdə iqtisadi aktivliyi təmin etməkdir. Bu məqsədlə hər bir şəhər və yaşayış məntəqəsi üçün ayrıca iqtisadi inkişaf istiqamətləri müəyyənləşdirilib.
Bununla yanaşı, logistik imkanların genişləndirilməsi və iqtisadi fəaliyyətin təşviqi istiqamətində kompleks tədbirlər həyata keçirilir”, – deyə iqtisadiyyat naziri qeyd edib.