23 milyard avroluq yeni su kanalı: Türkiyə öz "Süveyş kanalı"nı hazırlayır

Enerji böhranı və Hörmüz boğazının bloklanması ilə bağlı gərginlik fonunda Türkiyə İstanbul kanalı layihəsinin tikintisini sürətləndirir. 

Duzxeber.az xəbər verir ki, bu barədə "Business Insider Africa” məlumat yayıb.

Yeni süni su yolu Boğazla paralel şəkildə inşa olunaraq Qara dənizi Mərmərə dənizi ilə birləşdirəcək. Materialda qeyd olunur ki, kanal gündə təxminən 160 gəmi və tankeri qəbul edə biləcək.

"Express” nəşrinin məlumatına görə, layihənin ümumi dəyəri 23 milyard avrodur: bunun 13 milyardı birbaşa kanalın tikintisinə, 10 milyard avro isə ətraf infrastrukturun inkişafına yönəldiləcək.

2021-ci ildə Türkiyə prezidenti Rəcəb Tayyib Ərdoğan layihə ilə bağlı açıqlamasında bildirib ki, İstanbul kanalı ölkənin inkişaf tarixində yeni mərhələ açacaq və Boğaz ətrafında yaşayan əhalinin təhlükəsizliyini təmin etməyə xidmət edəcək.

Layihə ilə bağlı əsas müzakirə mövzularından biri rüsumların tətbiqidir. BMT qaydalarına əsasən təbii boğazlardan (məsələn, Bosfor) keçid pulsuzdur. Lakin Süveyş və Panama kanalı kimi süni su yollarında tranzit ödənişlidir. Bu səbəbdən İstanbul kanalı Türkiyəyə tranzitdən gəlir əldə etmək imkanı verəcək.

Müqayisə üçün, Süveyş kanalının gəlirləri 2026-cı ilin 1 yanvar–8 fevral tarixlərində 449 milyon ABŞ dollarına çatıb. "Arab News”un məlumatına görə, BVF bu gəlirlərin 2030-cu ilə qədər 11,9 milyard dollara yüksələcəyini proqnozlaşdırır.