Gənc samboçumuz Avropanı fəth etdi

Azərbaycan idmanında növbəti böyük uğur qeydə alınıb.
Duzxeber.az-ın məlumatına görə, gənc samboçumuz Tuncay Şamil Serbiyanın Novi Sad şəhərində keçirilən gənclər və yeniyetmələr arasında Avropa çempionatında möhtəşəm çıxışı ilə qızıl medal qazanaraq Avropa çempionu olub.
Yarışın son günündə tatamiyə çıxan idmançımız 98 kiloqram çəki dərəcəsində bütün rəqiblərini üstələyərək qitənin ən güclüsü adını qazanıb. Gərgin qarşılaşmalarda yüksək texnika, döyüş ruhu və möhkəm xarakter nümayiş etdirən Tuncay Şamil rəqiblərinə heç bir şans tanımayıb.
Bu parlaq qələbə Azərbaycan millisinin ümumi nəticələrinə də mühüm töhfə verib. Komandamız çempionatda 1 qızıl, 2 gümüş və bir neçə bürünc medal qazanaraq diqqət mərkəzinə düşüb.
Azərbaycan Sambo Federasiyasının prezidenti Ceyhun Məmmədov gənc idmançının çıxışını xüsusi vurğulayaraq bildirib ki, Tuncayın cəmi 20 yaşı olsa da, artıq böyük potensiala malikdir və gələcəkdə dünya səviyyəli uğurlar qazana bilər.
Qeyd edək ki, Tuncay Şamil bu zəfəri ilə təkcə Avropa çempionu olmadı, həm də Azərbaycanın idman gələcəyinə yeni ümid işığı yandırdı.
Ekspertlər onun yaxın illərdə dünya çempionluğu uğrunda əsas namizədlərdən biri olacağını düşünürlər.//Tribuna.az