Almaniyanın paytaxtı Berlində məhkəmə palyativ yardım həkimi Yohannes M-i ömürlük azadlıqdan məhrum edib. Məhkəmə təxminən bir il ərzində 12 qadın və 3 kişi olmaqla, 15 ağır xəstə pasiyentin qətlində ittiham olunan həkimin işinə baxıb.
DuzXeber.az  "BİLD" nəşrinə istinadən xəbər verir ki, prokurorluğun versiyasına əsasən, Yohannes M. 2021-ci ilin sentyabrından 2024-cü ilin iyulunadək evə etdiyi tibbi baxışlar zamanı heç bir tibbi zərurət olmadan və pasiyentlərin xəbəri olmadan onlara ölümcül dərman qarışığı yeridib.
İttiham aktında qurbanların yaşının 25 ilə 94 arasında dəyişdiyi göstərilir. Onların hamısı ağır xəstə olsa da, prokurorluğun iddiasına görə, yaxın vaxtlarda ölmələri qaçılmaz deyildi.
Yohannes M. uzun müddət susduqdan sonra məhkəmə prosesinin sonuna yaxın 15 qətldən 12-sini törətdiyini etiraf edib. O, pasiyentləri əzabdan xilas etdiyini düşünərək bu addımı atdığını bildirib.
Prokurorluğun məlumatına görə, hazırda daha 76 şübhəli ölüm faktı araşdırılır və bu iş üzrə yeni ittihamların irəli sürülməsi gözlənilir./Rəqibə Nazimqızı

Paylaş