Ümumdünya Səhiyyə Təşkilatı (ÜST) xəbərdarlıq edir ki, onkoloji xəstəliklərin artım dinamikası hazırkı templə davam edərsə və təxirəsalınmaz addımlar atılmazsa, 2050-ci ilə qədər dünyada xərçəngə yoluxanların sayı təxminən 35 milyona çatacaq.
DuzXeber.az xəbər verir ki, ÜST Beynəlxalq Xərçəng Araşdırmaları Agentliyi (IARC) ilə birgə hazırladığı "2026 Qlobal Xərçəng Vəziyyəti Hesabatı"nı ictimaiyyətə təqdim edib.
Hesabatda milyonlarla insanın xərçəngin yaratdığı fiziki, mənəvi və maddi yüklə üzləşdiyi vurğulanır: "Hər gün 26 mindən çox insan onkoloji xəstəliklər səbəbindən vəfat edir. İl ərzində təxminən 20.6 milyon yeni yoluxma və 10 milyona yaxın ölüm halı qeydə alınır. Xərçəng ürək-damar xəstəliklərindən sonra qlobal miqyasda ölümün ikinci əsas səbəbi olaraq qalır".
Sənəddə mövcud tendensiyanı dəyişmək üçün xəstələrin səhiyyə ehtiyaclarını və həyat təcrübələrini ön plana çıxaran, insan mərkəzli fundamental yanaşmaya ehtiyac olduğu bildirilir: "Təcili tədbirlər görülməzsə, illik xərçəngə yoluxma hallarının 2050-ci ilədək 35 milyon həddinə çatacağı ehtimal olunur".
Hesabatda, həmçinin xərçəngin qarşısının alınması, diaqnostika, müalicə və dəstəkləyici qayğıya çıxışda davamlı artan bərabərsizliklərə diqqət çəkilir. Milyonlarla insan ehtiyac duyduğu tibbi xidmətlərdən məhrumdur.
Təhlillərə əsasən, yüksək gəlirli dövlətlərdə süd vəzi xərçəngi aşkarlanan qadınların 87 faizi 5 il sağ qala bildiyi halda, aşağı gəlirli ölkələrdə bu göstərici cəmi 42 faiz təşkil edir. Hazırda dünya dövlətlərinin üçdə birindən azında onkoloji baxım xidmətləri universal tibbi sığorta paketlərinə daxil edilib.

Paylaş