Avstraliyada ilk dəfə göbələklərin kök şəbəkəsi olan mitselium və çətənə liflərindən hazırlanmış bioloji parçalana bilən tabutdan istifadə olunub.
DuzXeber.az bu barədə "The Guardian" qəzetinə istinadən xəbər verir.
Məqalədə qeyd olunur ki, mitselium və çətənə liflərindən "yetişdirilən" tabut cəmi 45 gün ərzində parçalanır və torpağı zənginləşdirir.
Məlumata görə, 70 yaşdan yuxarı Kerolin adlı qadının dəfn mərasimi sentyabrın 4-də Yeni Cənubi Uels ştatında keçirilib. Mərasim zamanı Niderland şirkətinin istehsal etdiyi bioloji parçalana bilən tabutdan istifadə olunub.
Qeyd edilir ki, Avstraliya bu dəfn üsulundan istifadə edən ilk ölkə deyil. Belə tabutlar artıq dünyanın 12-dən çox ölkəsində təqdim edilib.
İyunda Almaniyada "torpağa qayıdış" adlanan yeni dəfn üsulu qanuniləşdirilib. Bu üsulda mərhumun cəsədi ot, saman və digər bitki materialları ilə doldurulmuş qapalı "kokon"a yerləşdirilir. Konteynerin daxilində mikroorqanizmlərin təsiri ilə temperatur yüksəlir və bu, üzvi toxumaların parçalanmasını sürətləndirir. Nəticədə cəsəd humusa çevrilir.

Paylaş