İslam hüququnda dini və ya dünyagörüşü fərqinə görə hər hansı şəxsin özbaşına cəzalandırılması qəti şəkildə yolverilməz hesab olunur. Müsəlmanın hər hansı bir şəxsi, o cümlədən ateisti məhkəmə qərarı olmadan döyməsi və ya cəzalandırması İslam hüququ baxımından ağır cinayət və günah kimi qiymətləndirilir.

Mövzu ilə bağlı DuzXeber.az-a açıqlama verən ilahiyyatçı Tural İrfan bildirib ki, şəriətə görə səlahiyyətli qurumların qərarı olmadan heç kəsi döymək və ya cəzalandırmaq qəti şəkildə haramdır.

Onun sözlərinə görə, İslam fiqhində cəza vermək və hüquqi qərarlar qəbul etmək fərdlərin deyil, yalnız dövlətin və məhkəmə orqanlarının səlahiyyətindədir:

“İslamda cəza vermək, mühakimə etmək və qanunları tətbiq etmək səlahiyyəti fərdlərə deyil, yalnız qanuni dövlət rəhbərliyinə və məhkəmə orqanlarına məxsusdur. Hər hansı bir şəxsin özbaşına şəkildə ‘şəriəti tətbiq edirəm’ bəhanəsi ilə cəza icra etməsi İslam hüququna görə xaos, fitnə və anarxiya yaratmaqla yanaşı, dövlət qanunlarına qarşı çıxmaqdır”.

İlahiyyatçı qeyd edib ki, hətta hər hansı hüquqi hökm tətbiq olunmalı olsa belə, bu, mütləq rəsmi məhkəmə araşdırmasından, şahidlərin dinlənilməsindən və müttəhimə özünü müdafiə etmək şansı verilməsindən sonra yalnız hakim tərəfindən həyata keçirilə bilər: "Fərdlərin küçədə özbaşına hökm çıxarıb kimisə cəzalandırmaq hüququ yoxdur".

Tural İrfan vurğulayıb ki, qanunsuz olaraq döyülən şəxsin yetirilmiş xəsarətlərdən asılı olaraq qisas və ya diyyə (təzminat) tələb etmək hüququ yaranır:

“Göyərmə, qanama, sümük sınığı və digər bədən xəsarətlərinə görə şəriət prinsiplərinə uyğun maddi təzminat ödənilməsi və ya dövlət tərəfindən müvafiq cəzanın tətbiq olunması mümkündür. Bundan əlavə, dövlət hakimiyyəti cəmiyyətdə özbaşınalığa yol verdiyinə görə həmin şəxsi həbs və ya digər qanuni cəzalara məhkum edə bilər”.
Azərbaycandakı vəziyyətə də toxunan ilahiyyatçı qeyd edib ki, hər hansı dini toplumun və ya şəxsin dövlət qurumlarına müraciət etmədən qanunazidd əməllərə yol verməsi həm dini baxımdan haram, həm də hüquqi məsuliyyət yaradan əməldir.//Sara

Paylaş